Американските претседателски кандидати и нивните партии и во минатото биле во судир. Но она што ѝ го прави Доналд Трамп на Републиканската партија не само што е невообичаено, туку може да води и кон нејзин распад.
Претседателските кандидати и нивните партии не секогаш се на иста страна, и тоа не е ништо невообичаено. Всушност, политичките разлики меѓу кандидатите и делови од партијата се нормални. Но, вообичаено, двете страни се обидуваат да ги испеглаат разликите во итен рок по завршувањето на внатрепартиските избори и пред почетокот на националната кампања. Дури и кога партиските раководители имаа сериозни забелешки, како што бројни републиканци имаа забелешки за многу конзервативниот Бери Голдвотер во 1964 или Демократите со прогресивниот Џорџ Мекговерн во 1972, сепак партијата и кандидатот најчесто успеваа да соработуваат.
Токму од тие причини, актуелниот судир меѓу републиканскиот кандидат Доналд Трамп и неговата партија е исклучителен и ги шокираше аналитичарите.
„Ние сме на непозната територија“, вели Скот Лукас, професор на Американски студии на Универзитетот во Бирмингем. Најџел Боулс, поранешен директор на Американскиот Институт во Оксфорд, смета дека судирот меѓу Трамп и партијата „е без преседан во повоениот период“.
Иако јавниот судир е неверојатен сам по себе, сепак не е големо изненадување што тој се случува со оглед на сето она што се случуваше претходно.
„Аудио снимката беше големиот катализатор за ова да исплива на површина“, вели Лукас. Причината поради која водечките републиканци, како сенаторот Џон Мекејн или спикерот на Конгресот Пол Рајан, сега целосно му ја откажуваат поддршката е едноставна: страв.
Рајан и неговиот колега од Сенатот, Мич Меконел се длабоко загрижени дека мнозинството на Републиканската партија, особено во Сенатот, но и во Конгресот, е во опасност. „Тие се фокусираат на тој проблем затоа што се убедени дека Трамп сигурно ќе ги загуби изборите“, вели Боулс.
Со други зборови, раководството на републиканците се откажа од Трамп и сега се обидува да ја ограничи штетата. Но и тоа може да се покаже како изгубена кауза, затоа што Доналд Трамп силно удри по слабите темели на Републиканската партија.
Кршлива коалиција
Она што го знаеме како Републиканска партија од 1970-те години наваму, е всушност лабава коалиција на три различни групи, велат експертите: богати републиканци кои се пред сѐ заинтересирани за економски прашања и ниски даноци, евангелистички христијани, и белци од работничката класа чии плати одат надоле со децении. Иако овие три групи имаат некои заеднички нишки, нивните интереси често се разликуваат.
„Не постои теоретска или историска причина да се претпостави дека коалицијата може да остане стабилна на долг рок“, вели Боулс. „Чудото не е што сега се распаѓа, туку што и требаше толку време да се распадне“.
Републиканската партија веќе една генерација е длабоко поделена за економски и социјални прашања, вели Лукас: „Убавината на Роналд Реган беше што успеа да го одржи заедништвото на партија и покрај поделбата во 1980-те“.
Роналд Реган на двапати победуваше на изборите за претседател во 1980-те години.Фотографија: AP
Она што Реган успеа да го одржи заедно, сега Трамп го растури. Неговата кампања се фокусираше само на мобилизирање на белата работничка класа, во исто време одвраќајќи ги другите основни групи, како и неопределените.
„Трамп е натрапник, сериски натрапник“, вели Лукас. „Но Републиканската партија ја дозволи злоупотребата. Тие ја потценија моќта на Трамп да поттикне значајно малцинство од народот“.
„Јасно е кој ја растури“, додава Боулс. „Јасно е дека Доналд Трамп е архитектот на распадот. Прашањето за Републиканската партија на среден рок е дали ќе успее да се обедини повторно. Јас мислам дека тоа е малку веројатно“.
Непопуларните згради на Трамп низ светот
Огромното портфолио на недвижности на републиканскиот кандидат за претседател Доналд Трaмп му донесе многу пари, но и главоболки. ДВ прави критички осврт на дел од зградите на билионерот.
Фотографија: Getty Images/O.Kose
Големата сенка во Лас Вегас
Во октомври 2015 година, Демократската партија својата прва ТВ дебата мораше да ја одржи буквално во сенката на Трамп. Над луксузниот Вајн резорт во Лас Вегас каде се одржуваше ТВ дуелот, високо стои „Интернационалниот хотел и кула Трамп“. Тогашниот републикански претседателски аспирант се осигура дека неговото име ќе добие дел од вниманието. Комплексот Трамп е трета највисока зграда во градот.
Фотографија: Getty Images/J.Raedle
Отпор во Чикаго
Граѓаните на Чикаго се спротивставија на истакнувањето на името на Трамп на зградата на тамошниот „Хотел и кула Трамп“. Градоначалникот Рам Емануел го нарече потегот „нападен и без вкус“ и се обиде да го забрани поставувањето на големите букви на зградата. Сепак, пет години подоцна, Трамп успеа да го постави своето име на 16-от кат. Неговата зграда го зазема поранешното место на Чикаго Сан Тајмс.
Фотографија: Getty Images/S. Olson
Скандал во Атлантик Сити
Зградата Таџ Махал во Атлантик Сити, Њу Џерси беше комплетирана во 1990 година и чинеше 1 милијарда долари. Трамп беше на чело на хотелот и казиното речиси 25 години, но во 2014 година дојде на работ на банкрот. Тогаш комплексот беше преземен од „Ајкан Ентерпрајзес“ кои го задржаа името. Неговиот сестрински хотел, Трамп Плаза на истата улица, подоцна мораше да биде затворен поради несолвентност.
Фотографија: Getty Images/W.T.Cain
Гордоста на Трамп
За „Кулата Трамп“ во Њујорк кружат гласини дека е гордоста и радоста на Трамп. Кулата на 5-та Авенија, освен што претставува седиште на кампањата на Трамп за изборите, е и дом на повеќе добро познати станари. Меѓу нив се фудбалската легенда Кристијано Роналдо, актерот Брус Вилис и композиторот на театарска музика Ендру Лојд Вебер. Трамп и неговото семејство исто така живеат во луксузната кула.
Фотографија: picture-alliance/AA
Контроверзно обележје на Њујорк
Со простран атриум кој зафаќа шест катови исполнет со мермерни и златни детали, некои њујорчани ја сметаат „Кулата Трамп“ на 5-та Авенија за пример за лош вкус, додека други ја доживуваат како елегантна и безвременска. Ентериерот е дизајниран од Едвард Барнс Лараб, а екстериерот од Дер Скут. „Кулата Трамп“ е магнет за љубителите на модерната архитектура и секако, за фановите на Трамп.
Фотографија: picture-alliance/dpa/S.Reboredo
Бедата и сјајот на Панама Сити
„Океанскиот клуб Трамп“ во Панама Сити вклучува хотел, 700 апартмани и клуб за јахти. Највисоката зграда во Латинска Америка е препознатлива во регионот по нејзината уникатна форма. Оваа зграда наиде на критики поради тоа што се наоѓа веднаш до сиромашна населба, а тешко е да се најдат и станари. Но, Трамп веќе го продаде брендот на инвеститорот Роџер Кафиф и не изгуби пари на имотот.
Фотографија: Getty Images/AFP/R. Arangua
Шкотски отпор
„Најдобриот голф терен на светот“, вака Трамп го нарекува неговиот „Голф терен Трамп“, кој е лоциран во близина на Абердин, Шкотска. Сепак Доналд Трамп беше запрен да го прошири својот голф терен од страна на локалниот фармер Мајкл Форбс кој до денес одбива да му ја продаде неговата земја која се граничи со резортот.
Фотографија: Getty Images/J.-J. Mitchell
Ердоган против Трамп
„Трамп кулите“ во Истанбул се првите згради на Трамп во Европа и се познати поради нивните огромни вински визби. Во последно време имаше повици да биде отстрането името на Трамп од висококатницата. Ставовите на Трамп за исламот предизвикаа голем број на муслимани во Турција да го сменат мислењето за него, меѓу нив е и турскиот претседател Реџеп Таип Ердоган.
