На чело на донаторите денеска во Брисел се наоѓаат САД, како сила заштитничка на Косово. Покрај нив, како најголем донатор, ќе присуствуваат земјите членки на ЕУ, потоа Норвешка, Швајцарија и Саудиска Арабија. Тука се секако и меѓународните финансиски институции.

Од сите нив косовската влада очекува финансиска помош во висина од 1,4 милијарди евра. Според извештајот на Светската банка и Европската комисија, на Косово му требаат до 2011. 600 милиони само за изградба на сообраќајната инфраструктура. Натамошни 670 милиони се потребни за градење на училишта и инфраструктурни објекти за правосудниот систем и полицијата.

САД ветуваат 255 милиони евра

Евро-комесарот за проширување Оли Рен очекува финансиски ветувања во вкупен износ од една милијарда евра. Од нив, според вчерашната изјава на директорката на американската програма за развојна помош Хенријета Холсман Фоур, 255 милиони ќе дојдат од САД. Таа ги повика и останатите земји учеснички на конференцијата да го следат примерот на светската супер сила. Според неа влатите на Косово имаат изработено добар и веродостоен план за развој на земјата.

Може ли Косово да застане на сопствени нозе?

Косово веќе има добиено три милијарди евра помош од 1998-мата до денес. Но, и покрај тоа останува отворено прашањето дали поранешната српска покраина кога и да е ќе стане способна да преживее со сопствени сили. Косово, имено, спаѓа меѓу најсиромашните региони на Европа. Според податоците на Светската банка цели 37% од населението живее под границата на сиромаштија, што значи со помалку од 1,5 евра на ден. А стапката на невработеност изнесува околу 40 проценти.