Монголскиот главен град се гуши во смог и сообраќај. За да се реши овој проблем, се гради нов град јужно од Улан Батор. До 2030. година во Мајдар сити треба да живеат 90.000, а подоцна и до 300.000 жители. Градот го дизајнираше архитектот Штефан Шмиц од Келн. Симбол на еко-градот во камената пустина би требало да биде најолемата статуа на Буда во светот.

Саудискиот престолонаследник Мухамед бин Салман вели дека Неом ќе стане најсигурниот, најефикасен и најмодерен град во светот. Во новата специјална економска зона на Црвеното Море ќе бидат вложени 500 милијарди долари. Еколошкиот град со висока технологија би требало да креира услови за млади луѓе и да има сопствено законодавство. Првата фаза на изградбата треба да заврши до 2025. година.

Еколошкиот град Масдар сити во Обединетите Арапски Емирати требаше да биде готов во 2016. година. Во меѓувреме е отфрлена целта градот да биде целосно без емисија на штетни гасови, а завршувањето е одложено за 2030. година. Меѓународната агенција за обновливи енергии, ИРЕНА, и компании како Сименс веќе се вселија во градот, но жители нема.

Линганг Њу сити, во близина на Шангај, би требало да стане нов комерцијален центар. Го дизајнираа „Геркан, Марг и партнери“ од Хамбург. Градот нуди животен простор за 800.000 луѓе. Работни места би требало да бидат создадени во високотехнолошки истражувачки центри, во контејнерското пристаниште Јангсхан и во зоната на слободна трговија.

За да се создаде градот Сингдо, во морето беа истурени шест квадратни километри градежно земјиште. Сонгдо е планирано да биде „најпаметен“ град во светот, а веќе има 100.000 воглавно богати жители. Сообраќај и полиција, приватни куќи, сето тоа во градот е дигитално вмрежено и опремено со камери и сензори.

Пред Лагос, багерите насипуваат градежно земјиште за да направат место за луксузниот финансиски центар и станови за околу 250.000 луѓе. Еко Атлантик сити ќе биде град со трговски центри, пристаниште и облакодери. Во Нигерија повеќе од половината жители живеат во сиромаштија, па критичарите во Еко Атлантик сити гледаат изолирана населба за богатите.

Според интернет-страницата на проектот, зад плановите за Белмонт Смарт Сити во Аризона во САД стои основачот на Мајкрософт, Бил Гејтс. Околу 70 километри од градот Феникс, ќе биде изграден град за речиси 200.000 жители, место за тестирање на вмрежување „паметни“ куќи, „паметна“ работа и „паметен“ град. Проектот уште е на почеток.

Матичната компанија на Гугл, Алфабет холдинг, во Торонто во Канада гради нов кварт. Околу 10.000 луѓе овде би требало да живеат благодарени на дигитално вмрежување. Квајсајд Торонто е планирано да генерира незамисливи количини дигитални податоци за жителите.

Светот старее. Во 2010 година бројот на луѓето со повеќе од 65 години изнесувал 7,7% од светската популација. Според проценките на ОН, овој број ќе се искачи на 15,6% до крајот на 2050 година. Причините за ваквиот развој се ниските стапки на природен прираст на населението и зголемениот животен век на луѓето. Во земјите во развој особено се очекува луѓето да живеат подолго од претходно.

Пред еден век да се доживее 75 години беше исклучок. Луѓето на оваа возраст биле сметани за многу стари. Денес, пензионерите се често во добра здравствена состојба и целосно уживаат во животот. Во Германија има пет пати повеќе постари лица отколку пред 30 години.

Добрата физичка кондиција на постарите лица е поврзана со подобрената медицинска нега и просперитетот кој се зголемува. Овој тренд се појавува и во земјите во развој, каде што во иднина ќе бидат најголемиот дел на повозрасни лица и пензионери.

Во годините што доаѓаат ќе продолжи и трендот кај младите смејства кои сакаат сè помалку деца. Ова, делумно, се должи на тоа што жените повеќе ја ценат својата финансиска независност, а комбинацијата од деца и кариера тешко се балансира.

Друга причина поради која жените имаат помалку деца е затоа што сакаат подобар живот за нивните деца. Тоа е особено забележливо во посиромашните земји, каде што жените ги испраќаат своите ќерки во училиште наместо да ги обврзуваат да се грижат за семејството и домот.

На земјите во развој во основа им недостасуваат пензиски фондови и социјални системи, а поранешните високи стапки на природен прираст на населението неминовно ќе водат кон зголемување на бројот на возрасните.

Дури и во развиени земји како Германија, добрата грижа за возрасните е само дел од равенката. Иако има голем број на негувателски домови, тие се скапи. Како што се намалуваат пензиите, сѐ повеќе и повеќе возрасни стануваат сиромашни.

Во посиромашните региони, возрасните жени често се принудени да просат за да преживеат. Многу од нив целиот свој живот работеле во полињата и немаат право на пензија.

Низ целиот свет, пензионерите протестираат за соодветни пензиски фондови. Во Никарагва, на пример, пензионерите бараат минимална пензија од 70 евра месечно.

Обединетите нации бараат од државите низ светот да создадат можности за вработување за повозрасните луѓе. Нашето сегашно сфаќање за животот во пензионерските денови мора да биде променето. Дури и денес, голем дел од пензионерите работат како сопственици на мали бизниси.