Драконски казни за подбуцнувачите на немирите
17 август 2011![](https://static.dw.com/image/6592589_800.webp)
Две момчиња од северозападна Англија се осудени на по четири години затвор заради поттикнување на немири преку социјалната мрежа Фејсбук. Одлуката синоќа (16.08.11) ја донесе судот во грофовијата Честер. Ова е најстрогата казна по нередите од изминатата недела во Лондон и други британски градови. Судијата Елган Едвардс изјави дека се надева оти пресудата ќе делува предупредувачки за другите.
Двете момчиња преку Фејсбук повикале на улични немири и грабежи во северозападниот англиски град Нортвич како и во Варингтон. До тоа меѓутоа не дошло, оти полицијата навреме спречила избувнување на евентуални немири.
Пресудите престроги?
Во меѓувреме пристигнаа и првите критики за пресудите на британските судии, кои се сметаат за престроги. Групите за човекови права и парламентарци оценија дека дел од пресудите се „несоодвени“. Експертите по право очекуваат дека многу пресуди ќе бидат обжалени.
Британското министерство за правда соопшти дека досега, во Лондон, се обвинети 1.277 луѓе за кривични дела поврзани со минатонеделните немири. Две третини од обвинетите се задржани во притвор.
Автор: АТ/ БГ/ дпа/ миа
Редактор: Трајче Тосев