Д-р Гугл ќе упатува дали ви треба тест за коронавирус?
ЖА
14 март 2020
Гугл работи на развој на веб страница со чија помош граѓаните ќе можат сами да проценат дали при нивните постојни симптоми е неопходно да направат и тест за коронавирус. Најавата стигна од претседателот Трамп.
Фотографија: Reuters/J. Ernst
Реклама
Се чини дека интернет гигантот Гугл беше изненаден од неочекуваната најава на претседателот Трамп, па побрза да појасни: „Верили Лајф Сајанс", фирма чиј основач е Гугл, е во ран стадиум на развој на веб страницата, соопшти Гугл вчера. Претходно, американскиот претседател Доналд Трамп изјави дека голем развивачки тим на експерти од Гугл работи на проектот и веќе има постигнато значајни напредоци.
Според информациите пак на Гугл, веб страницата не била предвидена за општа употреба, прво би била тестирана во регионот на Сан Франциско, а доколку се покаже успешна, би била натамошно проширувана.
Американскиот потпретседател Мајк Пенс напротив објави дека новата веб страница веројатно ќе биде достапна уште до недела вечер: „Секој ќе може да ја отвори веб страницата, да ги внесе своите симптоми и да добие укажување дали му се препорачува да направи тест или не“, изјави Пенс.
Освен тоа, веб страницата на корисниците би требало да им ги посочи најблиските места каде можат да извршат тестирање дали се заразени со коронавирус.
Американскиот претседател Доналд Трамп поради ширењето на коронавирусот во земјата синоќа прогласи вонредна состојба. На тој начин сојузните држави полесно ќе стигнат до помошта од повеќе милијарди долари, за која одлуката ја усвои и Претставничкиот дом. Меѓу другото се предвидени даночни олеснувања и бесплатни тестови за коронавирус за граѓаните. Критичарите претходно го обвинуваа Трамп за задоцнето реагирање и минимизирање на опасноста од вирусот. Во земјата до вчера се регистрирани околу 1.300 заразени и околу 40 смртни случаи од коронавирус. Се претпоставува дека реалната бројка на инфицирани е поголема, со оглед што се тестирани релативно мал број луѓе. Од денеска во сила е забраната за влез на патници од Европа во САД,мерка која ја воведе претседателот Трамп.
Упатства: Како да се заштитите од коронавирус
Луѓето ширум светот ставаат заштитни маски за дишење за да спречат вирусна инфекција. Сепак, други мерки се поефикасни. Еве неколку совети засновани на упатствата на СЗО.
Фотографија: Getty Images/X. Chu
Подобро од ништо
Не е докажано дека маските за лице можат ефикасно да ве заштитат од вирусни инфекции. Овие маски веројатно се во можност да фатат некои микроби пред да стигнат до устата или носот. Но уште поважно е тоа дека тие ги спречуваат луѓето да ги допираат устата или носот (што повеќето луѓе го прават инстинктивно). Ако веќе сте болни, таквите маски може да спречат да не заразувате други.
Фотографија: Getty Images/Stringer
Дезинфицирајте ги рацете
Во својот список на препораки како да се заштитите од зарази, Светската здравствена организација не споменува маски за лице. На врвот е често миењето на рацете. СЗО препорачува дезинфекциско средство за рацете на база на алкохол, како на фотографијата, кои најчесто ги гледаме во болниците
Фотографија: picture-alliance/dpa/S. Pilick
И сапун и вода ќе завршат работа
Поедноставното секојдневно решение се водата и сапунот, ако ги имате при рака. Но, проверете дали темелно ги миете рацете...
Фотографија: picture alliance/dpa/C. Klose
Кашлање и кивање - но направете го тоа правилно!
Еве што препорачуваат лекарите: Кога кашлате и кивате, покријте ја устата и носот со вашиот подигнат лакот. Или користете книжни марамчиња - но потоа веднаш фрлете го марамчето и измијте ги рацете. А кошулата или џемперот? Не, нив не мора да ги фрлите. Но, перете ги често или однесете ги на хемиско чистење.
Фотографија: Fotolia/Brenda Carson
Стојте подалеку!
Друга препорака која можеби не функционира за сите: Избегнувајте близок контакт со секој кој има треска и кашлица! Ако треба да имате контакт со болни луѓе, погрижете се да преземете дополнителни заштитни мерки.
Фотографија: picture alliance/empics
Имате треска? Одете на лекар, а не на патување!
Ако имате треска, кашлица и отежнато дишење, побарајте лекарска помош навреме. Избегнувајте јавни места за да не ги инфицирате другите. И, исто така, објаснете му на вашиот лекар каде претходно сте патувале.
Фотографија: Reuters/P. Mikheyev
Избегнувајте контакт!
При посета на сточни и зелени пазари во области во кои во моментот има случаи на новиот коронавирус, избегнувајте директен незаштитен контакт со живи животни. Тоа исто така вклучува какви било површини кои се во контакт со животни.
Фотографија: DW
Добро термички обработено - не сурово!
Варете,печете и пржете го месото темелно. Потребно е да се избегне конзумирање на сурови, недоволно термички обработени производи од животинско потекло. Со суровото месо, млекото или животинските органи треба да се постапува внимателно за да се избегне инфицирање од термички необработена храна. Овие се добри практики за безбедност на храната и помагаат да се спречи ширењето на болести.
