Европскиот парламент ја обвинува Комисијата предводена од  Урсула фон дер Лајен дека не ги исцрпила сите правни средства за да ја принуди Полска да ги промени своите контроверзни судски реформи.

Конкретно, Европскиот парламент го критикува фактот дека Комисијата во Брисел сè уште не го искористила таканаречениот механизам за владеење на правото, кој е во сила од почетокот на годината. Со овој механизам може да се скратат исплати од заедничкиот буџет на ЕУ на некоја земја членка тешки милијарди евра, доколку државата ги прекрши принципите на правната држава.

Полска и Унгарија исто така го тужат пред Европскиот суд на правдата

Полска и Унгарија, меѓутоа, поднесоа тужба против овој механизам до Европскиот суд на правдата (ЕСП). Постапката сѐ уште е во тек. Комисијата на ЕУ всушност сакаше да преземе дејствија против Полска дури откако ЕСП ќе одлучи по тужбата на двете држави. Тоа го предвидува и договорот постигнат меѓу шефовите на држави или на влади на членките на ЕУ. Со него, владите во Будимпешта и во Варшава во минатата година беа убедени да се откажат од блокадата на важните буџетски одлуки на ЕУ.

Германската канцеларка Ангела Меркел се изјасни за тоа да се сочека одлуката на ЕСП. На крајот на минатата недела, по самитот на ЕУ, Урсула фон дер Лајен јасно стави до знаење дека ќе ја следи оваа линија: „Сакаме да ја сочекаме пресудата на судијата и да ги разгледаме можните последици“, рече таа.

Критичарите ги обвинуваат како унгарската, така и полската влада за влијание врз националните судства спротивно на стандардите на ЕУ. Тие, поради тоа, гледаат закана и за буџетот на ЕУ, бидејќи, по правило, националните органи за спроведување на редот и законот и судовите се одговорни за истрага на можната злоупотреба на фондовите на ЕУ.