Унгарскиот премиер Виктор Орбан прави сѐ што може за да биде запрена постапката на ЕУ против неговата земја. Сепак, нема успех на повидок. Со денешната пресуда, Европскиот суд на правдата сега дури и дотура сол на раната.

Унгарија не успеа со жалбата против тековната постапка на ЕУ во врска со обвинувањата за сериозни повреди на основните вредности на Унијата од страна на властите во Будимпешта.

Европскиот суд на правдата денеска пресуди дека одлуката на Европскиот парламент во 2018 година, која доведе до постапката против Унгарија, била законски донесена.

Повеќе:

-Долго очекуван црвен картон за Унгарија

-Кој ги има Орбан и компанија за партнери, не му требаат непријатели

-Унгарија може да го загуби правото на глас во ЕУ

Во септември 2018 година, европратениците гласаа за преземање мерки против владата на унгарскиот премиер Виктор Орбан за наводно поткопување на демократските вредности и владеењето на правото.

Со гласањето беше препорачано активирање на постапка по основа на таканаречениот Договор за функционирање на ЕУ, член 7, според кој Унгарија може да се казни со укинување на правото на глас. 

Унгарија  поднесе жалба на одлуката, тврдејќи дека Европарламентот при пребројувањето на гласовите требало да ги земе предвид и оние кои се воздржале од гласањето. Доколку било постапено така, според мислењето на Будимпешта, одлуката немало да биде усвоена

Судиите во Европскиот суд на правдата, меѓутоа, јасно ја отфрлија аргументацијата на Унгарија, истакнувајќи дека одлуката на Европскиот парламент била усвоена согласно законот. 

Во 2018 година европратениците изразија загриженост за слободата на печатот, академските слободи, малцинските права и дури и независноста на судството во Унгарија.