МВР денеска ќе ги соопшти деталите за синоќешната акција во Крушепек. Разликата во шпекулациите - дали се запленети 1,2 тона или само 1 килограм кокаин, може да изнесува 1.119 килограми лажни вести.
Реклама
Голема акција, голема заплена на кокаин или преувеличувања за изборно-пропагандни цели? Повод за ваквите дилеми се синоќешните медиумски информации кои се повикуваа на извори во полицијата, а според кои во скопското село Крушопек биле запленети 1,2 или 1,3 тони кокаин. Потоа бројките се стопија, па од истите извори стигнуваа неофицијални информации дека е запленет само 1 килограм.
Потпретседателот на ВМРО-ДПМНЕ, Александар Николоски, на гостување во ТВ „Телма“ изјави дека никогаш порано немало толку кокаин како во последните три години, но откако Наќе Чулев дошол во Министерството за внатрешни работи - веднаш имало акција за сузбивање.
„Тоа е разликата“, потенцираше Николоски.
Претходно за истата тема на социјалните мрежи се огласи пратеникот на ВМРО-ДПМНЕ, Илија Димовски.
„Во три години власт на СДСМ не слушнавме дека е запленет ниту еден килограм кокаин…Денес МВР заплени 1,3 тони…Најголема количина било кога запленета во РМ… Слепи ли биле? Или…?“, праша Димовски.
Кратко памтење, или..?
Точно пред два месеца (19-ти декември 2019) во Скопје беа приведени и притворени актерката Силвија Стојановска и нејзиниот сопруг В.Б., во рамките на меѓународна акција спроведена од шпанската и македонската полиција заедно со Службата за борба против трговија со дрога на Соединетите Американски Држави - ДЕА. Во таа акција, во Шпанија бил уапсен и братот на сопругот на Стојановска. Сите се товарат дека биле дел од меѓународна криминална мрежа, која по инструкции на лидерот на групата организирале транспорт на вкупно 700 килограми кокаин од Колумбија до Шпанија.
„По акцијата во Скопје, во следниот период во Шпанија се приведени и други лица кои биле дел од групата“, велат од Обвинителството за ДВ.
Во очекување на факти
Денеска треба да бидат соопштени деталите за вчерашната акција, која министерот за внатрешни работи Наќе Чулев вчера ја најави на Фејсбук.
„Ја информирам јавноста дека Министерството за внатрешни работи во овој момент презема широк спектар на оперативни мерки и активности. По насоки на јавен обвинител и по наредба на судија на претходна постапка се вршат претреси на подрачјето на село Крушопек во близина на Скопје поради недозволена трговија со дрога. Целиот капацитет на Министерството за внатрешни работи е ставен во заштита на граѓаните и безбедноста на државата. Помина времето кога високото раководство во МВР соработуваше и ги поддржуваше криминалните структури во државата. Повеќе информации за јавноста ќе соопштиме во текот на утрешниот ден“, објави Чулев.
Јавноста со внимание очекува да слушне колкава е количината на запленетиот кокаин во Крушопек. Според непотврдени информации, пронајдениот килограм кокаин пристигнал заедно со пратка на банани, внесени во земјава со камион и истоварени во магацин во Крушопек. Товарот тргнал од Црна Гора, преку Албанија, до Скопје. Возачот на каминот наводно бил црногорски државјанин.
Во моментов нема информации дали синоќепната акција во Крушопек била дел од меѓународна акција. Голем број домашни медиуми неа ја доведоа во врска со веста што ја објавија италијански медиуми, дека при рутинска контрола во италијанскиот град Порденоне бил уапсен државјанин на Албанија кој во Европа внел 1,2 тони кокаин, пренесуван со бродски транспорт од Јужна и Централна Америка во временски период подолг од една година.
Дрога од германска „кујна“
Многу од она што денес се призведува во илегални лаборатории на дрога всушност е откритие на германски хемичари. Некои од наркотиците потекнуваат уште од времето на Хитлер.
Напад на германските - зависници
Уште при нападите врз Полска во 1939. и врз Франција во 1940. год. Хитлеровите генерали им испраќале дрога на војниците во борба. Во нападот врз Франција на борците им биле поделени 35 милиони таблети Первитин - синтетичка дрога метамфетамин, нарекувани и „чоколадо за тенкисти“ или „таблетите од Геринг“. Сепак, треба да се каже дека и сојузниците на своите војници им испраќале слични таблети.
Фотографија: picture-alliance/dpa-Bildarchiv
Буден, без чувство на страв и глад
Волшебното средство на германскиот Вермахт во почетокот го открил еден Јапонец, во течна состојба. Хемичарите на берлинската фабрика Темлер натамошно го развиле и го патентирале во 1937. година. Една година подоцна, можело да се купи како средство против умор, глад, страв, под друго име: кристал - мет.
И лично - најголем потрошувач?
Историчарите уште спорат дали и Адолф Хитлер бил зависник од Первитин. Во личните документи за пациентот, водени од Хитлеровиот лекар Морел, многу често е запишан знакот „Х“. Што значи таа забелешка, не е јасно до денес. Сепак, недвојбено се знае дека Хитлер добивал многу силни лекови кои денес би завлегувале далеку во сферата на наркотички средства.
Истражувачкиот дух на германските научници е забележан многу порано: „Веќе нема кашлање благодарение на - хероинот!“ Тоа е рекламна порака на концернот Бајер за неговиот нов производ, кој одлично се продавал. Медикаментот хероин, навистина чист хероин, се препорачувал и за астма, шизофренија и срцеви болести. Дури и за деца! Сепак, со предупредување од несакано дејство - затвор (опстипација)!
Креативни хемичари
Феликс Хофман го слават првенствено поради откритието на аспиринот. Неговото второ откритие - хероинот - му успеало попатно, додека експериментирал со оцетна киселина. За разлика од аспиринот, хемичарот киселината ја поврзувал со морфин, исушен афион. Неговиот производ во Германија всушност е забранет дури во 1971. година. До 1957. година можел да се купи во секоја подобро снабдена аптека.
Кокаин за офталмолози
Концернот Мерк од Дармштата од 1862. година наголемо произведувал кокаин и го продавал како локален анестетик за очните лекари. Тоj е резултат на експериментите на Алберт Ниман со листови на кока од Јужна Америка. Хемичарот издвоил посебен алкалоид кого го нарекол кокаин. Ниман умрел набрзо по своето откритие - додуша, од болест на белите дробови.
Фотографија: Merck Corporate History
„Еуфоричен и полн елан“
И лекарот - невролог Зигмунд Фројд лично, во име на науката, испробувал кокаин. Во своте „Белешки за кокаинот“ Фројд овој препарат го опишува како „безопасен“. „Се чувствувате“, пишува тој, „еуфорично, полни сте со животна сила и со работен елан“. Неговото одушевување попуштило откако од дрога умрел негов пријател. Средството во негово време се препишувало и против главоболки и стомачни болки.
Фотографија: Hans Casparius/Hulton Archive/Getty Images
Екстази од времето на валцерите на Штраус
Американскиот хемичар Александер Шулгин се смета за пронаоѓач на „дрогата за забави“ - екстази. Но, тоа е нешто што очигледно уште во 1912. година го откриле во германската фабрика Мерк. Тие тогаш поднесле барање за патентирање за безбојното масло наречено 3,4 -метилендиокси - Н -метиамфетамин или накратко, МДМА. Ова откритие германската фабрика го прогласила за „комерцијално неисплатливо“.
Фотографија: picture-alliance/epa/Barbara Walton
Злосторства
Откритијата на германските хемичари, секако без зла намера, денес не се нешто вредно за гордеење. Според студијата на ОН, само во текот на 2013. година во светот умреле околу 190.000 луѓе поради консумирање илегални наркотици. Слаба утеха е што дрогите не се на прво место- од алкохол таа година умреле дури 3,3 милиони луѓе.