Расположението за трошење во Германија се разведрува, навреме пред божиќниот период. Нирнбершкиот институт за истражување на потрошувачката (ГфК) во своето истражување во септември утврдува дека расположението на Германците за трошење е речиси на ниво како пред корона-кризата. Претходно, барометарот за расположението за трошење бележеше пад два месеца по ред.

Порастот на расположението се објаснува со оптимизмот во однос на изгледите за платите во земјата и позитивните проценки на конјунктурната состојба, оценува ГфК. Инаку, генерално, расположението за трошење сѐ уште не е доволно добро, зашто Германците се и натаму претпазливи, објаснува експертот за потрошувачка Ролф Биркл. Желбата за трошење е помала и во однос на септември 2020 година, кога корона-кризата беше во полн ек.

Пандемијата сѐ уште го диктира расположението на потрошувачите. „Зголемувањето на инциденцијата во времето на спроведување на студијата беше значително забавено, а во моментов бројките се дури и малку помали. Тоа е причина за зголемување на оптимизмот на потрошувачите дека четвртиот бран ќе биде многу поблаг отколку што многумина стравуваа“, објаснува Биркл.

Повеќе:

Короната ги натера Германците да си ги чуваат парите

Германците штедат и се богатат

Според него, иако потрошувачката клима е речиси на истото ниво како пред пандемијата, прерано е да се зборува за промена на трендот. „Тоа зависи пред сѐ од состојбата со инфекцијата во зимските месеци и од тоа дали ќе бидат потребни нови рестрикции.“

„... Обврската за носење маски и правилата за држење дистанца, и покрај полните паричници, и натаму ја 'убиваат' желбата за купување“, вели Биркл.