Во следните три години Маск нема да биде на чело на Извршниот одбор, а компанијата „Тесла“ треба да плати 20 милиони долари казна, гласи неговата спогодба со Американската комисија за хартии од вредност.
Фотографија: picture alliance/Zumapress/M. Summer
Реклама
Според спогодбата, Илон Маск ќе остане извршен директор во производителот на електромобили „Тесла“, но мора да го напушти местото директор на управата. Комисијата за хартии од вредност на САД го обвини во четвртокот Маск за измама извршена со објавувањето низа лажни вести преку социјалните мрежи и погрешно наведување на инвеститорите. Против него беше поднесена тужба пред Федералниот суд во Менхетен поради твитовите на Маск од пред два месеца, во кои тој најави повлекување на компанијата од берзата. Елон Маск тврдеше дека инвеститорите го поддржуваат неговиот план, финансирањето е осигурано, а на акционерите ќе им бидат понудени 420 долари по акција, што беше една петтина повеќе од тогашната цена.
Подоцна Маск ретерираше и се испостави дека воопшто не разговарал за ваква можност со ниеден инвеститор. Курсот на акциите претрпе турбуленции по твитовите на Маск.
По тужбата против Маск, акциите на „Тесла“ во петокот забележаа пад од преку 11 проценти.
Некои се мислат, а некои веќе си заминаа од Фејсбук
Бројни компании соопштија дека го напуштаат Фејсбук или го стопираат користењето на социјалната мрежа. Од Фејсбук велат дека малку луѓе досега ги напуштиле поради скандалот со злоупотребата на лични податоци
Фотографија: Colourbox/Maxx-Studio
SpaceX и Тесла
Елон Маск, милијардерот сопственик на фабриката за електрични автомобили Тесла и ракетно производство SpaceX, на Твитер објави дека ги брише обата профили на неговите компании на Фејсбук. Одлуката делуваше спонтана, откако Маск напиша дека „не знаел“ оти SpaceX воопшто има Фејсбук профил. Профилите на двете компании имаа 2,6 милиони следбеници пред да бидат избришани.
Фотографија: Reuters/T. Baur
Моѕила
Компанијата која е сопственик на популарниот интернет пребарувач „Фајрфокс“ соопшти дека го стопира рекламирањето на Фејсбук. Но, нема да го избрише својот Фејсбук профил, туку ќе престане да постира информации за надградби. „Кога Фејсбук ќе преземе посилна акција во однос на споделувањето на лични податоци... ќе размислиме дали да се вратиме“, соопшти компанијата.
Фотографија: LEON NEAL/AFP/Getty Images
Комерцбанк
Една од најголемите германски банки најави дека го стопира рекламирањето на Фејсбук. „Ќе паузираме со рекламирањето на Фејсбук. Заштитата на податоците и сочувањето на добриот бренд се важни за нас“, изјави директорот за бренд менаџмент на Комерцбанк. Тој вели дека компанијата ќе причека да види што ќе се случува пред да ги преземе следните чекори.
Фотографија: Daniel Roland/AFP/Getty Images
Коосновачот на WhatsApp Брајан Актон
„Време е. #deletefacebook“. „Избриши го Фејсбук“, напиша коосновачот на апликацијата за пораки на Твитер на 20 март. Тој стана милијардер откако му го продаде WhatsApp на Фејсбук во 2014. Неодамна инвестираше во ривалска апликација за пораки наречена Сигнал. Во 2009 година, Актон неуспешно аплицирал за работа во Фејсбук.
Фотографија: picture-alliance/dpa/M. Gerten
Сонос
Производителот на звучници од САД најави повлекување на рекламите од Фејсбук и други социјални платформи, меѓу нив и Инстаграм. Од Сонос оценуваат дека последните откритија отвориле прашања за тоа дали Фејсбук прави доволно за заштита на приватноста. Но сепак, фирмата нема целосно да го напушти Фејсбук.
Фотографија: picture-alliance/AP Photo/Sonos
Др. Еткер се пишмани
Германската компанија за храна ги праша своите следбеници на Твитер дали да го избрише профилот на Фејсбук. „Ќе го избришеме нашиот Фејсбук профил за 1,000 ретвита“, соопштија тие на 21 март. Постот набрзо беше ретвитан 1,000 пати, и компанијата го избриша својот Фејсбук профил. Но, еден ден подоцна тој беше реактивиран, а компанијата на Твитер напиша дека „не може“ без Фејсбук.
Фотографија: Dr. Oetker
Одговорот на Фејсбук
Запрашани да ја коментираат најавата на фирми кои ја напуштаат социјалната мрежа, од Фејсбук велат: „Повеќето фирми со кои разговаравме се задоволни од чекорите кои ги најавивме за подобра заштита на личните податоци, и тие имаат доверба дека ќе одговориме на овие предизвици и ќе станеме подобри партнери и компанија“.
