Турскиот претседател изјави дека турските сили во Сирија ги фатиле жената, сестрата и зетот на убиениот лидер на ИД, Абу Бакр ал-Багдади.
Фотографија: picture-alliance/dpa/Al-Furkan
Реклама
Повеќе од една недела откако поранешниот исламистички лидер на терористичката милиција Исламска држава, Абу Бакр ал-Багдади, загина по акција на американска специјална единица во Сирија, турскиот претседател Реџеп Таип Ердоган тврди дека турските војници заробиле неколку члена на семејството на Ал Багдади.
„САД соопштија дека Ал Багдади се убил во еден тунел. Тие стартуваа медиумска кампања за тоа. Но, овде за првпат ја објавувам следната информација: ние ја уапсивме неговата жена, а не подигнавме толкава прашина како нив. Освен тоа, ги фативме и неговата сестра и зетот во Сирија“, изјави Ердоган во говор одржан на Универзитетот Анкара, без да прецизира каде и како била фатена жената на Ал Багдади.
Високорангиран турски функционер на почетокот од оваа недела изјави дека турски војници ја уапсиле сестрата на Ал Багдади, Расмија Авад, нејзиниот маж и нивни деца кај сирискиот град Азаз.
Расмија Авад, сестрата на Ал БагдадиФотографија: picture alliance/dpa/AP
Абу Бакр ал-Багдади, како што изјави американскиот претседател Доналд Трамп во телевизиско обраќање до нацијата на 27. октомври, се разнел со експлозивен појас откако бил откриен од страна на американската армија во Идлиб, на границата меѓу Сирија и Турција. Со него загинале и три негови деца. Според Трамп, САД добиле голема помош за операцијата од Русија, која им го отворила воздушниот простор, и од локалните Курди. Претставник на курдската милиција во Сирија тврдеше дека нивен таен агент успеал да се инфилтрира во кампот на Ал Багдади и да му ја украде долната облека, на која бил извршен ДНК тест со кој бил утврден идентитетот на терористичкиот лидер. Според американскиот државен секретар Мајк Помпео, во акцијата на американските специјалци биле убиени и две жени на Ал Багдади.
Абу Бакр ал-Багдади се прокламираше за калиф на Исламска држава во 2014 година и се сметаше за одговорен за илјадници убиства на верски малцинства на Блискиот Исток, како и за серија терористички напади низ светот.
Што всушност претставува „Исламска држава“?
„Исламска држава“, покрај разорувањата во Ирак и Сирија, во вестите често се наоѓа и поради нејзината бруталност. Што е ИД и колку е моќна? Во продолжение ви претставуваме одговори на најчесто поставуваните прашања.
Што е „Исламска држава“?
Се смета дека „Исламска држава“ е фракција од терористичката организација Ал Каеда, т.е. сунитска милитантна група, за која се верува дека е формирана како одговор на недовербата и фрустрациите од неуспешното владеење на владите во Сирија и Ирак. На нивното знаме пишува „Мухамед е пророкот на Бог“ и „Нема друг бог освен Алах“ - фрази со кои се согласуваат сите муслимани, не само „ИД“.
Фотографија: AP
Каде е активна „Исламска држава“
Целта на „Исламска држава“ е формирање на „калифат“ - држава каде се почитуваат традиционалните вредности на исламот и шеријатското право. Поради нестабилноста на регионите во Сирија и Ирак, „Исламска држава“ успеа да освои и да стави под своја контрола тероитории во двете држави.
Што ја прави „Исламска држава“ различна?
Клучна разлика е бруталноста на „Исламска држава“ со која се влева страв кај противниците и цивилите - преку егзекуцијата со обезглавување и бруталното насилство. Лидерите на „ИД“ велат дека владеат со регионите кои ги освојуваат. Експертот за Средниот Исток, Шади Хамид за ПБС изјави: „Тие нудат социјални услуги. Управуваат со локалната власт. Обезбедуваат минимално ниво на право и поредок“.
Фотографија: gebphotography - Fotolia.com
„ИД“ во однос на останатите терористички организации?
„ИД“ е активна во Сирија и Ирак, но нигериската терористичка организација Боко Харам неодамна ја изрази својата поддршка. Тоа е како натпревар во суровост: додека Боко Харам е одговорна за 13.000 смртни случаи, „ИД“ е одговорна за најмалку 24.000 повредени или убиени. Ал Каеда се дистанцираше од „ИД“, а една од нејзините фракции наречена Нусра Фронт се бори против „ИД“.
Фотографија: Getty Images/A. Katib
Кои се следбениците на „Исламска држава“?
Нешто по кое се разликува „ИД“ се нејзините следбеници. Повеќе од 20.000 странски борци се придружија на групата, од кои повеќе од 4.000 доаѓаат од западна Европа и северна Америка. На сликата се прикажани државите од каде што потекнувааат најголемиот дел на борците. Најголем број борци - споредено со вкупниот број на жители на земјите, доаѓаат од мали земји како Шведска и Белгија.
Што преземаат западните влади против „Исламска држава“?
Од август 2014 година, коалиција предводена од САД спроведува воздушни напади против цели на „ИД“ во Сирија (1.422 напади) и Ирак (2.242 напади). Некои влади исто така беа активни во рамките на нивните држави: Германија ќе процесуира најмалку 30 осомничени милитанти кои се вратиле од Сирија, додека Саудиска Арабија уапси 93 осомничени милитанти во април 2015 година.
