Европската унија направи чекор кон отворање на внатрешните граници и дозволување на патување, но шансите за заживување на туризмот во летната сезона се неизвесни.
Фотографија: Steve Strike
Реклама
Туристичкиот сектор учествува со една десетина во економијата на ЕУ, но пандемијата на коронавирусот го колабираше, па Европската комисија сега повикува на неограничено слободно движење со неопходната заштита.
„Нашите мисли сега се насочени кон летото и кон местата во кои сакаме да патуваме“, изјави потпретседателката на Комисијата Маргрет Вестагер. „Тоа значи преземање постепени, внимателни чекори за повторно патување на линија со она што ни го кажува науката“.
Туристичката индустрија ги поздрави препораките на ЕУ како прв чекор за спасување на нивниот бизнис, иако тие не се обврзувачки за сите 27 земји-членки. Притоа, се препорачува надворешните граници на ЕУ да останат затворени најмалку до средината на јуни.
На некои држави кои беа силно погодени од пандемијата не им се брза да ги отворат границите. Извори во шпанското МНР велат дека Шпанија нема намера да ги отвори границите за патници до јули.
Според предлогот на Комисијата, авиокомпаниите и аеродромите ќе инсистираат патниците да носат маски, ќе ги реорганизираат чек-инот, оставањето и земањето на багажот. Нема да се бара средните редови во авионите да бидат слободни. Комисијата бара ваучерите за откажаните патувања да бидат валидни најмалку една година, со заштита од банкрот, за луѓето да ги прифаќаат нив наместо да бараат рефундирање.
Некои европски држави веќе спроведуваат сопствени планови за олеснување на патувањето. Трите балтички држави, Литванија, Летонија и Естонија се договорија да ги отворат меѓусебните граници од 15 мај. Австрија и Германија ќе го сторат истото на 15 јуни. Швајцарија планира целосно отворање на границите за сите соседи, освен за Италија, од 15 јуни.
Коронавирус: Туристички атракции без посетители
Поради коронавирусот морничава тишина владее на многу туристички знаменитости, особено во Италија, но и во други земји. Погледнете како изгледаат овие места сега без вообичаените турканици..
Туристичките атракции во Италија се особено погодени од кризата со коронавирусот. Целата земја е во карантин. Продавниците се затворени, туристите ја напуштија земјата. Плоштадот Свети Петар во Рим е затворен, музеите и знаменитостите веќе не се отворени за јавноста.
Фотографија: picture-alliance/dpa/Zuma/G. Galazka
Тивкиот Милано
На северот на Италија, само големи групи гулаби се осмелуваат да излезат на улиците. Катедралата во Милано се извишува осамена и напуштена кон небото. Во Италија има полициски час на национално ниво. На луѓето им е дозволено да ги напуштат своите домови само кога одат на работа или кога одат да купат неопходни намирници.
Фотографија: picture-alliance/dpa/AP/L. Bruno
Празни места во Мадрид
По Италија, Шпанија е втората европска земја која е најпогодена од кризата со коронавирусот. Досега нема прогласено полициски час. Плоштадот Махор, обично пулсирачкиот центар на Мадрид е празен. Огромниот плоштад обично го посетуваат стотици илјади туристи секоја година. Во околината има повеќе од 3.000 ресторани, барови, кафулиња и таверни.
Жителите на Австрија, исто така, не можат веќе слободно да се движат. Од вторникот (18. март 2020) сите пабови и ресторани, покрај останатото, се затворени. Обележјето на Виена - катедралата Свети Стефан- е затворена за посетители, црковните служби се одвиваат без верници и се емитуваат на радио. И вообичаено многу посетениот плоштад пред катедралата е празен.
Карловиот мост во Прага вообичаено е преполн. Обележјето на градот сега е тивко. Чешката Република прогласи вонредна состојба поради кризата со коронавирусот и воведе широка забрана за влез и излез од земјата. Сите прекугранични транспортни врски со возови и со автобуси, исто така, се запрени. Слободата на движење на жителите е строго ограничена.
Фотографија: picture-alliance/dpa/AP/D. Josek
Франција во вонредна состојба
Претседателот на Франција рече дека земјата е во војна против коронавирусот. А министерот за внатрешни работи ги нарече „воени сојузници“ сите оние кои сега остануваат дома. Онаму каде што обично се разминуваат илјадници луѓе - Ајфеловата кула или Лувр во Париз - деновиве ретко може да се види некој.
Фотографија: picture-alliance/abaca/E. Blondet
Берлинските знамениости затворени
Берлин е сѐ попразен, иако сè уште не е прогласен полициски час. Знаменитостите како Рајхстагот се затворени. Театрите и музеите, исто така. Туризмот е ставен на пауза во Германија. Хотелите и останатото сместување сега можат да се користат само за „неопходни и исклучиво нетуристички цели“.
Фотографија: picture-alliance/dpa/M. Kappeler
Туризмот во режим на спиење
Дури и јавните знаменитости се празни. На улиците има само неколку туристи, како кај Бранденбуршката порта. Но, дури и ако сега има целосно чист поглед на обележјето на Берлин, посетата и не е баш забавна.
