Најостра осуда за организираниот напад врз Собранието
СН/ дв
29 април 2017
Нападот врз државна институција која е во срцето на демократијата е напад врз самата демократија, порачуваат заеднички претставниците на ЕУ, САД, НАТО и ОБСЕ во Македонија
Фотографија: Reuters/O. Teofilovski
Реклама
Првите луѓе на Делегацијата на ЕУ, Американската амбасада, Мисијата на ОБСЕ и на Канцеларијата за врски на НАТО во Скопје, вчера одржале заеднички состанок на кој ја разгледале безбедносната ситуација во земјата по сериозните инциденти во македонскиот парламент.
Во заедничката изјава објавена денеска тие, како што велат, најстрого го осудуваат организираниот напад врз Собранието на 27 април.
Истотака се изразува сериозна загриженост поради тоа што властите не успеале да го спречат тој напад и не ја овозможиле неопходната безбедност на пратениците и на присутните новинари:
„Нападот врз државна институција која е во срцето на демократијата е напад врз самата демократија“, се вели уште во заедничката изјава .
Мирни протести и лекување на раните
01:37
This browser does not support the video element.
Највисоките претставници на ЕУ, САД, ОБСЕ и НАТО во Македонија очекуваат дека брзо ќе биде спроведена истрага за овие кривични дела и оти организаторите и извршителите на нападите ќе бидат изведени пред правдата а судовите ќе постапуваат независно. Истотака, како што се вели во изјавата тие очекуваат, државните институции брзо да ги извлечат неопходните заклучоци и да преземат соодветни мерки.
Високите меѓународни претставници упатуваат и повик до сите субјекти да се однесуваат одговорно и да придонесат кон мирен, демократски процес на кој мора да му се дозволи да оди по својот тек. Нивниот апел до граѓаните е пак тие да бидат воздржани, да избегнуваат провокации и да останат смирени. „Со насилство земјата и општеството не може да одат напред“, се истакнува во заедничката изјава на првите луѓе на Делегацијата на ЕУ, Американската амбасада, Мисијата на ОБСЕ и на Канцеларијата за врски на НАТО во Скопје.
Сведоштва за „крвавиот четврток“ во македонскиот парламент
Невидени хаотични слики: Откако мнозинството пратеници го избра пратеникот на ДУИ Талат Џафери за претседател на Собранието, на противење на пратениците од ВМРО ДПМНЕ, во законодавниот дом упадна толпа насилни луѓе.
Фотографија: Reuters/O. Teofilovski
Навала пред вратите на Парламентот
По изборот на Талат Џафери за нов претседател на Парламентот, од иницијативата „За заедничка Македонија“ ги повикаа граѓаните да излезат уште помасовно на протест, со цел да ја спасат државата од, како што истакнаа, влегување во сценарио од кое нема враќање назад. Толпата почна да притиска кон вратите на Собранието за да влезе во него.
Фотографија: Reuters/O. Teofilovski
Слабо присуство на полицијата
Неколку големи групи граѓани влегоа во парламентарната зграда, во пленарната сала, во фоајето и во други простории на парламентот, откако полицијата не го спречи првиот бран од граѓани кои протестираа против изборот на нов претседател на Собранието.
Фотографија: Reuters/O. Teofilovski
Незапирливо „заземање“ на Парламентот
Меѓу оние кои упаднаа имаше и маскирани лица со качулки, кои фрлаа столици во собраниските простории и медиумска опрема.
Фотографија: Reuters/O. Teofilovski
„За заедничка Македонија“ во Собранието
Во закондавниот дом завладеа хаос. Тука беа организаторите на иницијативата „За заедничка Македонија“, тука беа и министри и пратеници на ВМРО-ДПМНЕ.
Фотографија: picture-alliance/dpa/B. Grdanoski
Знамиња и песни
Дел демонстранти ја „зазедоа“ и Пленарната собраниска сала, каде што пееја песни и вееја знамиња.
Фотографија: picture-alliance/abaca/B. Ademi
Напади врз пратениците на СДСМ
Демонстранти навлегоа и во прес-центарот, каде што беа пратениците на СДСМ и ДУИ и почнаа да ги тепаат со столови и со сè што ќе им дојде до рака. Крвнички напаѓани беа Зоран Заев, Дамјан Манчевски, Максим Димитриевски, Радмила Шеќеринска, Хари Локвенец, Зијадин Села. Полиција немаше.
Фотографија: picture-alliance/abaca/N. Batev
Полицијата се „разбуди“
По повеќе од еден час по почетокот на инцидентите, полицајци влегоа во Собранието и се обидоа да ги извлечат пратениците од прес-центарот, но беа избркани од толпата што ги држеше како заложници. Толпата се забарикадира во прес-центарот.
Фотографија: Reuters/O. Teofilovski
Евакуација на повредените пратеници
Некаде пред 22 часот дојдоа и специјалци, па почнаа да се обидуваат да ги вадат повредените од забарикадираниот прес-центар.
Фотографија: Reuters/O. Teofilovski
Извлечени пратениците
Кратко пред полноќ пратениците од парламентарното мнозинство беа извлечени од Собранието, а пред него и понатаму останаа насобраните демонстранти.
Вкупно стотина лица се повредени, од кои четворица се пратеници. Целото Собрание е демолирано, тврдат новинари, од кои дел исто така беа напаѓани.
Фотографија: Reuters/O. Teofilovski
Шатори пред Собранието
Припадници на движењето „За заедничка Македонија“, кое ги предводи демонстрациите, кои синоќа прераснаа во безредија и насилство, поставија шатори пред Собранието и најавија дека ќе останат таму „колку што е потребно“, за да ја „одбранат Македонија“.
