ЕУ очекува уште работа пред изборите
7 април 2016![](https://static.dw.com/image/19132959_800.webp)
Европската Комисија очекува сите политички фактори во Македонија да останат посветени на она што беше договорено во однос на изборите, но и во однос на реформските приоритети кои произлегуваат од Договорот од Пржино. Од Брисел нема конкретен став во однос на најавата од опозицијата дека ќе ги бојкотира изборите.
„Што се однесува до изборите во јуни, постигнат е напредок во подготовките, но треба да се стори уште за изборите да бидат во согласност со стандардите. Ние како ЕУ ќе продолжиме да се ангажираме со партнерите во земјата за тоа да се постигне“, изјави портпаролката Маја Коцијанчич на редовната прес-конференција.
Таа порача дека е во интерес на земјата и на граѓаните е кризата успешно да биде разрешена.
Амбасадорот на ЕУ во Македонија, Аиво Орав попладнево ја критикуваше состојбата во медиумите. Тој оцени дека постои недостаток на балансирано и рамноправно известување, автоцензура на новинарите, недостаток на пристап до јавни информации. Орав има забелешки и на транспарентноста во финансирањето на медиумите, додека финансирањето на јавниот сервис го смета за неадекватно.