ЕУ парламент: Лондон да ја плати сметката, па да си оди
БГ
5 април 2017
Парламентот на ЕУ денеска ѝ порача на Велика Британија дека ќе мора да се постигне согласност за финансиско порамнување пред да може да започне преговори за трговски договор.
Фотографија: Getty Images/AFP/S. Bozon
Реклама
Пратениците во парламентот на ЕУ денеска со големо мнозинство од 516 гласа наспроти 133 кои беа против, изгласа резолуција која ги поставува основните принципи за заминувањето на Велика Британија од ЕУ, вклучително и „сметката за разводот од ЕУ“. Резолуцијата е прв официјален одговор на една институција на ЕУ откако минатата недела почна да отчукува часовникот за Брегзит. Во истовреме, тоа е и јасно одбивање на барањето на британската премиерка Тереза Меј која сака преговорите за напуштање на ЕУ и оние за нов трговски договор со ЕУ да течат паралелно.
Иако официјалната пресметка за „сметката за разводот“ сѐ уште не постои, претставници на ЕУ сигнализираа во изминатиот период дека Британија ќе мора да плати околу 60 милијарди долари за неплатени буџетски и пензиски обврски и гаранции за заеми.
Британски претставници ја отфрлаат таа пресметка.
Главниот преговарач на ЕУ за Брегзит, Мишел Барние, рече дека неговата цел е да постигне „единствено финансиско порамнување, кое ќе ги покрие сите обврски“.
„Никогаш нема да го казниме Обединетото Кралство - никогаш! Само ќе бараме да ги испочитува обврските кои ги презедовме заедно“.
Лидерот на парламентарниот блок на Европската народна партија, Манфред Вебер ја предупреди Британија дека нема да има можност за „пребирање“. „Една држава надвор од ЕУ не може да добие исти или подобри услови од држава која е внатре во ЕУ“, рече Вебер.
Парламентот ќе мора да го одобри конечниот договор за Брегзит кој ќе го постигнат ЕУ и британските преговарачи. Рокот за тоа е март 2019 година.
Збогум Британија, ние си заминуваме...
Британските компании многу пати предупредуваа за потенцијалните негативни последици по економијата од Брегзит. По референдумот за напуштање на ЕУ, некои компании размислуваат да ги релоцираат компаниските седишта.
Фотографија: picture-alliance/dpa/W. Kumm
Водафон
Втората по големина компанија за мобилна телефонија во светот ја разгледува опцијата да го премести своето седиште надвор од Британија по Брегзит. Диселдорф би можел да биде една од опциите за новото седиште на компанијата. Водафон веќе е присутна во германскиот град каде вработува околу 5.000 луѓе, исто така, Германија е најголемиот пазар на компанијата.
Фотографија: Getty Images/AFP/M. Hayhow
Рајанер
Најголемата авиокомпанија за ефтини летови во Европа официјално е регистрирана во Ирска, но голем дел од нејзината флота е лоцирана во Британија. Но, тоа може наскоро да се смени – од Рајанер најавуваат дека своите летала повеќе нема да ги стационираат таму.
Фотографија: picture-alliance/dpa/M. Scholz
Изиџет
Втората по големина авиокомпанија за ефтини летови во Европа е базирана во Лондон, но, до кога? „За тоа ќе видиме“, изјави извршната директорка на компнанијата Керолин Мек Кол во телевизиско интервју. Изиџет е една од најпрофитабилните компании во Европа.
Фотографија: Getty Images/AFP/F. Guillot
Вирџин
Ричард Бренсон е еден од најпознатите бизнис личности во Британија. За Брегзит тој изјави: „Британија е насочена кон економска катастрофа“. Неговиот конгломерат изгуби една третина од вредноста по референдумот во земјата. Бренсон ја повика владата да организира втор референдум.
Фотографија: Getty Images/AFP/D. Leal-Olivas
ЏејПиМорган Чејс
Најголемата банка во САД вработува околу 16.000 луѓе во Лондон. Но, менаџментот сега разгледува повеќе можности да премести дел од операциите надвор од Британија. Извршниот директор на банката, Џејми Димон, пред референдумот изјави дека помеѓу 1.000 и 4.000 работни места може да бидат преместени надвор од Лондон доколку се случи Брегзит.
Фотографија: Getty Images/C.Gillon
Виза
Оваа компанија ќе нема голем избор освен да го намали бројот и обемот на активностите во Британија, што ќе доведе до кратење на стотици работни места. Според регулативата на ЕУ, компанијата мора да одржува центар за податоци во земја на ЕУ. Што практично ќе значи крај за податочниот центар на компанијата во Лондон.
Фотографија: Imago
Форд
Од Форд неколку пати изјавија дека Британија е „клучен пазар“ за компанијата во Европа. Фабриката на Форд во Дагенхам произведува делови и мотори за филијалите на компанијата во Германија. По одлуката за напуштање на ЕУ, од Форд изјавија дека компанијата ќе ги преземе сите потребни мерки да остане конкурентна на пазарот.
Фотографија: picture-alliance/dpa
Јагуар Ленд Ровер
Сепак, сите компании не се песимисти. „Ние сме Британци и стоиме зад Британија“, изјави Едријан Халмарк, одговорен за стратегии во Јагуар Ленд Ровер. Нема промени во нашите бизнис планови, уверува Халмарк за периодот од следните две години во кои Британија со сигурност ќе остане дел од ЕУ.
