Во петокот вечерта беше утврден составот на квалификационите групи за наредното светско фудбалско првенство што ќе се одржи во Германија од 9-ти јуни до 9-ти јули 2006-та година. 150 милиони луѓе во светот го следеа телевизискиот пренос, а на извлекувањето во Франкфурт присуствуваа повеќемина државни селектори.
Англискиот селектор, Швеѓанецот Свен-Јеран Ериксон, оцени дека неговата селекција се наоѓа во тешка група, но нагласи: "Долг е патот до светското првенство и мислам дека е тешко, многу тешко денес да се зборува за него. Ние прво треба да го одиграме Европското првенство, што ќе биде наредниот голем предизвик".
Двајца германски тренери со репрезентации на други земји ќе се обидат да се изборат за учество на светското првенство. Берти Фогтс ги предводи Шкотланѓаните:
"Германците се перфектни организатори и ние знаеме дека ако се пласираме за Германија 2006-та дека овде ќе не очекува перфектен турнир".
Ото Рехагел е селектор на Грција. За волјата на жрепката тој рече: "Мора да се прифати она што ќе дојде. Можеме да бидеме задоволни. Ги имаме Данска и Турција. Грците против Турците - тоа секогаш е посебен натпревар".