Жана Немцова-репортер во Дојче веле
17 јули 2015![](https://static.dw.com/image/18591210_800.webp)
По своите студии по економија на Државниот универзитет за меѓународни односи во Москва, Немцова својата новинарска професионална работа ја започна во руската ТВ РБК, каде водеше емисии и интервјуираше претставници на стопанството и политиката. По убиството на својот татко, Борис Немцов, опозициски политичар и критичар на рускиот претседател Путин, Жана Немцова прво планираше да остане во Русија за да врши притисок во целосното расветлување на убиството. „Гледаме колку се мачни истрагите. Не само јас, туку и многумина други пројавуваат оправдано сомневање во нормалниот тек на истрагата. За тоа е потребна политичка волја, а неа ја нема“, изајви Немцова за Дојче веле во мај 2015 година.
Откако својата безбедност во Москва ја оцени за загрозена, Немцова реши да ја напушти Русија: „Примав закани. Посебен притисок врз мене се вршеше да не инсистирам толку интензивно на истрагата во случајот со убиството на мојот татко.“
Дојче веле сега на Немцова и‘ нуди можност за слободна новинарска работа и безбеден живот. Директорот на Дојче веле Петер Лимбург изјави: „Многу се радувам што Жана Немцова ќе работи во Дојче веле. Со својот јасен став и своите познавања натамошно ќе ја зајакне нашата успешна руска понуда.“
Жана Немцова во својата нова задача гледа „можност да го користам своето новинарско искуство на начин на кој што веќе не ќе можев да го правам во Русија. Дојче веле за многумина луѓе во Русија е доверлив извор на информации. Се радувам на работата во руската редакција.“