Постојат индиции дека причина за железничката несреќа кај Ајхах, во германската покраина Баварија, која се случи синоќа и во која загинаа две лица, е човечки фактор. Притворен е надлежниот раководител на сообраќајната служба. Против 24-годишникот постои сомневање за извршено дело убиство од небрежност, соопшти денеска претставник на полицијата.

Обвинителството од Аугсбург моментно испитува дали против осомничениот ќе биде издаден налог за апсење.

Регионалниот воз кој од Аугсбург возел кон Инголштат синоќа на само неколку стотици метри од железничката станица Ајхах фронтално удрил во локомотивата на товарен воз, кој не бил во движење. Притоа загинале 37-годишниот возач на локомотивата на регионалниот воз и една 73-годишна патничка, а поголем број патници се повредени.

Неколку часа претходно во горна Баварија се случи уште една железничка несреќа со исто така две жртви. На необезбеден железнички премин во Зехаупт на Штајнбергерзе еден регионален воз зафатил патничко возило и го завлекол неколку стотици метри, загинале возачот и совозачот на автомобилот.