Додека едни живеат на кредит, други штедат во евра. Македонските граѓани во просек должат над 1.500 евра на банките. Најмногу се задолжувале на картички и за станбени кредити.
Фотографија: DW/E. Milosevska Fidanoska
Реклама
Граѓаните летово сѐ повеќе се задолжувале на кредитните картички за да преживеат и земале кредити за купување стан, отколку што биле подготвени да се задолжат за купување на нов автомобил. Најновите анализи на Народната банка покажуваат дека во јуни на граѓаните најмногу им биле одобрени потрошувачки и станбените кредити, кои што бележат месечно зголемување од 1,3 и 1,9 отсто, а годишниот раст изнесува 7,9 и 14,7 отсто.
До јуни вкупно за кредити се дадени над три милијарди евра, со што македонските граѓани во просек на банките им должат по 1.500 евра, пред сѐ за потрошувачки кредити (1,7 милијарди евра). На кредитните картички се имаат задолжено околу 170 милиони евра, многумина ги имаат исцедено и последните резерви на тековните сметки, искористувајќи го и минусното салдо, а голем е бројот и на оние коишто се задолжиле кај банките за да купат нов стан.
Кредитите одобрени на кредитни картички, летово се зголемиле за 0,5 отсто, додека на годишна основа се намалени за 8,9 проценти. Кај негативните салда на тековните сметки, во јуни, е остварен месечен пад од 0,4 отсто, а на годишно ниво растат за 3,4 проценти. Кредитите одобрени врз други основи во јуни оствариле месечен раст од 0,6 отсто, при годишен пад од 6,6 проценти, покажуваат анализите на Народна банка.
Станбените кредити бележат годишен раст од речиси 15%, додека опаѓа интересот на граѓаните да се задолжуваат за да купат ново возило. Па така, во јуни автомобилските кредити, се намалени на месечно и годишно ниво за 2,9 и 17,1 отсто.
Додека едни се задолжувале, други граѓани штеделе пари „за да им се најдат“. На годишна основа, депозитите на домаќинствата забележуваат порастат за 4,2 отсто, со што заштедите се над 4,7 милијарди евра. Граѓаните најчесто се одлучувале да ги орочат средствата на пократок временски период, а заштедите ги чуваат во странски валути.
Како да штедите како Германците?
Корона-кризата ги анимира Германците да штедат како никогаш досега,покажуваат најновите статистики. А Германците, и без тоа, се светски шампиони во штедење. Кои трикови и методи ги користат за да заштедат пари?
Фотографија: Alexander Speckmann
Домашно сметководство
Контролирањето на вашите приходи и трошоци ви помага да спречите отворање финансиски дупки во вашиот личен или семеен буџет. Експертите советуваат да водите белешки на лист хартија или во Ексел-табела за фиксните месечни трошоци - како што се изнајмување, осигурување или рати за кредит. На овој начин лесно ќе дознаете колку ви останува за книги, облека и за забава.
Фотографија: Fotolia/photocrew
„Принцип на празна тегла“
Останатиот износ по одземањето на основните трошоци е полесно да се распредели ако го користите „принципот на празна тегла“. Тој ќе ви помогне да ги определите категориите на трошоци (материјали за обука, патувања, нова чанта, задоволства и сл.) и да им дадете приоритет. Првите преостанати средства треба да се искористат за пополнување на теглата резервирана за најважниот трошок.
Фотографија: Fotolia/PA
Разумно пазарување
Планирањето на пазарувањето може да ви помогне да избегнете спонтани набавки за кои подоцна може да зажалите. Ако влезете во продавница со список на потребни производи, ризикот да купите нешто непотребно е помал. Можете, исто така, да користите мобилни апликации за оваа намена. Исто е многу важно да не влегувате во продавница на празен стомак и да одвоите само ограничено време за пазарување.
Фотографија: picture alliance/chromorange
„Секонд-хенд“ производи
Користената облека можеби не е по сечиј вкус, но особено младите во Германија активно ги користат можностите на „секонд-хенд“ односно трговијата на користена стока. Учебниците се најпопуларни, но во универзитетите, на пример, има и огласни табли за користен мебел, лаптопи и дигитални фотоапарати, а на некои места се организираат пазари за користени велосипеди.
Фотографија: picture-alliance/dpa/S. Sauer
Разменска трговија
Германците мора да одат во продавница за да купат нова облека. Специјалните интернет страници за размена, како што се Tauschbörse.de или Kleiderkreisel.de, им помогаат да заштедат пари. Сепак, овој вид на шопинг носи дополнителни трошоци за испорака. Друг недостаток е тоа што не можете да ја вратите облеката ако се покаже дека е тесна или широка.
Фотографија: Colourbox
Споделување на храна
Споделувањето на храна заштедува не само природни ресурси, туку и пари. Порталите за т.н. споделување на храна нудат прехрамбени производи кои некој ги има вишок или имаат слаб комерцијален изглед. На ваков начин работат јавни фрижидери во некои градови во Германија.
Фотографија: DW
Поправи сам
Скршено тркало? Прегорен апарат? Цените на услугите за поправка во Германија се високи. Можете да заштедите многу пари ако посетите работилница како што е Кафулето за репарирање (Repair Cafe). Вработените ќе ви покажат како да внесете нов живот во оштетениот апарат. Сепак, постои еден услов: треба сами да го поправите, слушајќи ги нивните совети.
