Институтот за Судска медицина во Скопје ја заврши постапката за земање биолошки материјал од роднините, со цел да се помогне во идентификацијата на загинатите во автобуската несреќа во Бугарија. Резултатите добиени до ДНК анализата утре ќе им бидат предадени на бугарските истражни органи, коишто треба да пристигнат во Скопје. Најавено е дека во земјата треба да допатуваат главниот обвинител Иван Гешев и истражител од Бугарија. 

Директорот на Институтот за судска медицина, Александар Станков, кој изминативе денови беше во Бугарија, за ДВ вели дека е при крај и обдукцијата на телата која што ја вршат бугарските колеги. По денешните сомнежи кои што ги изнесоа бугарските истражители дека во автобусот се пронајдени 44, а не 45 загинати лица, Станков вели дека дури откако ќе заврши споредбата на примероците од ДНК анализата, ќе може да се утврди точниот број на настрадани лица. 

„Направени се 44 обдукции, но има и остатоци од тела коишто ќе се поврзат со ДНК анализата“, вели Станков. 

Портпаролката на главниот обвинител на Бугарија, Сијка Милева и бугарскиот заменик-јавен обвинител, Борислав Сарафов, денеска тврдеа дека  на местото на трагедијата се пронајдени 44 тела. Милева пред бројните бугарски и македонски медиуми сподели дека се сретнала со еден од преживеаните кој и раскажал како го скршил стаклото на автобусот и дека спасил осуммина, а не седум лица, како што досега се тврдеше. 

Претпоставките се дека или сведокот направил грешка, или патниците се префрлале од еден во друг автобус, па можно е во возилото да имало еден патник помалку. Тие најавија проверки на граничните премини, со цел да се утврди колкумина влегле, и колкава бројка на патници ја напуштиле земјата.