Заврши заложничката драма во Келн, грабнувачот повреден
15 октомври 2018![Deutschland Geiselnahme im Kölner Hauptbahnhof](https://static.dw.com/image/45894245_800.webp)
Во акција на специјалците во аптека во главната железничка станица во Келн, грабнувачот кој држеше едно женско лице како заложник е „ставен под контрола“, соопшти полицијата. Притоа, грабнувачот е потешко повреден и во тек е лекарска интервенција заради негова реанимација, додека заложничката поминала со полесни повреди. Мотивите за делото не се познати, но се исклучува терористичка заднина. Исто така не е познат ниту идентитетот на грабнувачот.
Првиот аларм за заложничката драма кај полицијата стигнал во 12 часот и 45 минути, по што бројни полициски сили ја обиколија и евакуираа железничката станица. Железничкиот сообраќајот во станицата во Келн сѐ уште е во прекин, исто како и јавниот градски превоз на линиите кои поминуваат низ железничката станица.
Телевизијата Н-ТВ јави дека кратко пред грабнувањето дошло до инцидент во ресторан за брза храна во железничката станица. Телевизијата тврди дека грабнувачот држел како заложник 14-годишно девојче, кое го полеал со запаллива течност и го запалил, по што го ослободил. Новинската агенција ДПА јави дека од железничката станица е пренесено повредено девојче во болница. Нејасно е дали тоа е во врска со заложничката драма, портпаролка на полицијата изјави дека уште се испитуваат сите детали од случајот.