Во Давос денеска се разговараше за прашања како - на кој начин би можела да се етаблира приватната економија во вселената или како претприемачите да се подготват за екстремни ситуации. И се разговараше за политика. На една тркалезна маса, познати лица се обидуваа да одговорат на прашањето - како да се излезе од кругот на насилство на Блискиот исток. Хавиер Солана со констатација: "Роудмап е првиот признат мировен план од страна на Советот за безбедност со кој може да се постигне напредок. Парадоксот меѓутоа е во тоа што кога го имаме решението во рака, ситуацијата на теренот е полоша од кога и да е досега."

На тркалезната маса немаше препорака како да се излезе од спиралата на насилство. Тука не помогна ниту познатиот "Дух на Давос". На форумот се разговараше и за Ирак и за дијалогот на цивилизации, но најголемиот дел од економските босови се разбира беше дојден да разговара за економија, пред се' за прашањето: колку е издржлив малиот економски полет кој во моментов може да се почувствува во светот? Проценката на Клаус Цумвинкел, шеф на Германската пошта, гласи:

"Расположението е пригушено оптимистичко, но има и ризици како што се доларот или теророт. Доколку тие не се материјализираат, ќе имаме разумни стапки на пораст."