Експресен воз кој доаѓал од Минхен во Чешка се судрил со патнички воз, во несреќата има три жртви, јави агенцијата ЧТК утрово, повикувајќи се на извори од спасувачките екипи. Повредени се 38 патници, седум од нив се наоѓаат во критична здравствена состојба. Во акција биле десетици спасувачи и  четири хеликоптери заради извлекување, згрижување на луѓето и нивно пренесување во болници. Помош пристигнала и од Германија.

„Ситуацијата е сериозна, на пат сум кон местото на несреќата“, изјави чешкиот министер за сообраќај Карел Хавличек.

Експресниот воз Минхен – Прага, според првите сознанија, кај Домазлице, во близина на германската граница, превидел сигнал за запирање, по што се судрил со регионален воз, кој сообраќал на релација Плзен – Домазлице.

На чешките пруги често доаѓа до несреќи, сигналната техника на многу места се смета за крајно застарена. Владата започна со програма за модернизација. Пред една година во близина на германската граница кај Ерцгебирге фронтално се судрија два воза, при што загинаа две лица, од кои еден Германец.