Заев очекува поддршка за почеток на преговори од сите во ЕУ
ЖА / агенции
22 јуни 2018
Македонскиот премиер очекува Македонија идната недела да добие датум за почеток на преговори со ЕУ. По поддршката од Холандија, Заев се надева на промена на задршките и од Париз. Од Меркел честитки за договорот со Грција
Фотографија: Press service of the Government of Republic of Macedonia
Реклама
Одговарајќи на прашања на новинарите во врска со задршките на Франција за одредување датум за почеток на преговори, македонскиот премиер Зоран Заев денеска изјави дека се надева оти чекорите кои ги презема Македонија ќе ги убедат сите кои сѐуште имаат резерви околу проширувањето на ЕУ.
„Се надевам дека ниедна од земјите на ЕУ нема да остане рамнодушна на пријателството и европските манири кои ги покажа Македонија, а кои се толку потребни на цел Балкан и Европа. Холандскиот парламент донесе позитивна одлука за нашата земја. Се надевам дека Франција и другите држави, ако имаат резерви, ќе ги надминат, зашто реформите во ЕУ можат да се прават паралелно додека Македонија преговара за членство“, изјави Заев при почетокот на изградбата на патот Ранковце-Крива Паланка.
Пристапните преговори, како што изјави тој, траат со години, а Македонија, унапредувајќи се како држава, може да помогне и во унапредувањето на Европа преку преговарачкиот процес.
„Се надевам дека ќе омекне и срцето на францускиот претседател Макрон. Ги разбирам внатрешните дебати кои се отвораат во Франција, но Франција е наш голем пријател“, истакна Зев.
Договор за решавање на спорот за името
Договорот за решавање на спорот за името меѓу Македонија и Грција беше потпишан на 17 јуни 2018. Тој би требало да му стави крај на спорот кој трае четврт век. Но, до неговото конечно спроведување има уште работа.
Договорот за решавање на спорот за името во Псарадес, на грчката страна од Преспанското Езеро, го потпишаа министрите за надворешни работи Никола Димитров и Никос Коѕијас. „Горди сме затоа што избравме решение што нѐ обединува“, оцени македонскиот премиер Заев. Неговиот грчки колега Ципрас рече: „Овде сме да ги залечиме раните што ги остави времето, да отвориме пат за мир, братство и пораст“.
Фотографија: Reuters/A. Konstantinidis
Роденден
Потпис на договорот стави и долгогодишниот посредник на Обединетите Нации во спорот за името, Метју Нимиц. Потпишувањето се падна токму на неговиот 79-ти роденден. „На членовите на моето семејството им реков дека не сакам подароци за овој роденден, зашто двајца премиери ќе ми дадат еден голем подарок“, рече Нимиц на церемонијата во Псарадес.
Фотографија: Reuters/A. Konstantinidis
Вратоврска
Кога по потпишувањето на договорот требаше да се направи семејна фотографија од настанот, македонскиот премиер Зоран Заев, веројатно не сакајќи да се разликува од Алексис Ципрас, кој е познат по тоа што не носи вратоврски, ја извади својата црвена вратоврска и му ја подари на својот грчки колега. Тоа беше поздравено со широки насмевки и громогласен аплауз од присутните.
Фотографија: Reuters/A. Konstantinidis
Договорот зачинет со македонска храна и вино
Официјалната средба по потпишувањето во Псарадес се префрли на македонскиот брег на Преспанското Езеро. Двете делегации до Отешево стигнаа по воден пат, со чамци. Во Отешево се водеа билатерални разговори и имаше свечен ручек. На заедничкиот ручек присуствуваа и претставниците на Европската Унија и Обединетите Нации – Федерика Могерини, Јоханес Хан, Метју Нимиц и Розмари Ди Карло.
Фотографија: Reuters/A. Konstantinidis
Протести во Скопје
Потпишувањето на договорот за решавање на спорот за името предизвика протести во Македонија. Демонстрантите пред Собранието на 17.06.2018 се судрија со полицијата. Во безредијата имаше повредени и приведени лица. Според полициски наводи, има неколку повредени полицајци, како и над 25 уапсени учесници на протестите. Официјален организатор на протестите нема.
Во Грција исто така се протестира. Противниците на договорот за решавање на спорот за името во Атина за време на расправата за доверба на владата на Ципрас се судрија со полицијата пред парламентарната зграда (фото: 16.06.2018). Полицијата мораше да употреби солзавец за да ја разбие толпата која се обиде да влезе во парламентарната зграда. Владата го преживеа гласањето.
Фотографија: Reuters/C. Baltas
Уште многу работа
Ставањето потпис на Конечната спогодба за решавање на спорот за името е само еден од чекорите кои следуваат во наредните месеци до конечно решение. Следува ратификација во македонското Собрание, референдум на кој македонските граѓани ќе се изјаснат за договорот, а потоа и ратификација во грчкиот парламент.
Денеска германската канцеларка Ангела Меркел упати честитки до македонскиот премиер Зоран Заев по повод договорот за македонско-грчкиот спор за името.
Меркел во официјалната честитка изразува задоволство за постигнатиот договор.
„Оваа спогодба го отвора патот за историски договор и Вам и на Вашата влада срдечно Ви честитам за овој успех. Сојузна Република Германија со голем интерес ќе го следи спроведувањето на договорот и силно ќе го поддржи“, се истакнува во писмото со честитки од канцеларката Меркел до премиерот Заев, какво што е упатено и до грчкиот премиер Алексис Ципрас.
