Заложничката драма во Келн - неуспешен напад?
16 октомври 2018![Deutschland Geiselnahme im Kölner Hauptbahnhof](https://static.dw.com/image/45893970_800.webp)
Вооружениот напаѓач на главната железничка станица во Келн вчера околу пладне запалил Молотов коктел во ресторан за брза храна и потоа со еден заложник се забарикадира во блиска аптека.
Специјална единица на полицијата вчера попладнето упадна во аптеката, при што грабнувачот е тешко ранет во стомакот од куршум. Заложникот претрпел полесни повреди. Во блискиот ресторан за брза храна претходно било повредено 14-годишно девојче од Молотовиот коктел фрлен од напаѓачот, а уште еден човек доживеал шок. Истрагата смета дека системот за автоматско гаснење пожар со силните млазови вода го принудил напаѓачот да го напушти ресторанот, по што тој се забарикадира во аптеката земајќи за заложник една жена. Тој бил вооружен со мали плинска боци и запалливо средство.
„При влегувањето во аптеката, според изјави на минувачите, напаѓачот извикал дека припаѓа на терористичката група Даеш, што е арапско име за терористичката милиција Исламска држава. Но, натамошни докази во оваа насока нема“, изјави раководителот на истрагата, Клаус Ришеншмит синоќа. Истрагата мора да го утврди и точниот идентитет на грабнувачот. На местото на инцидентот е најден документ на 55-годишен Сириец, кој има дозвола за привремен престој во Германија до средината на 2021 година. Сопственикот на документот е релативно познат од 2016 година поради различни деликти, како кражби и закани. Се вели дека постои висока веројатност напаѓачот да е сопственикот на документот.
По драматичните часови на заложничката драма, истрагата е насочена и кон тоа дали делото евентуално има терористичка заднина. Преку Твитер полицијата утрово ги повика сведоците да испратат фотографии или видеа поврзани со настанот, ако евентуално располагаат со такви.
Повеќе:
Заврши заложничката драма во Келн, грабнувачот повреден
Од целосната блокада на железничката станица во Келн поради инцидентот, која траеше до доцните синоќешни часови, засегнати беа илјадници патници и стотици возови. Од утрово железничкиот сообраќај повторно се одвива редовно.