Русија се чувствува неправедно третирана поради протерувањето на нејзините дипломати од над 20 земји во светот и планира контрамерки.
Фотографија: Reuters/A. Zemlianichenko
Реклама
„Западот неосновано ја казнува Русија“. Така отприлика гласи збирно реакцијата на руските претставници по протерувањето руски дипломати од многу западни земји. Министерството за надворешни работи на Русија повторува дека земјата нема ништо со атентатот во Солсбери. Министерот Сергеј Лавров изјави дека протерувањето на дипломатите е резултат на „колосално уценување“ од страна на САД и најави: „Ќе одговориме. Таква подлост не може никој да прифати само така, па ни ние.“
Во соопштение на русокото МНР се вели дека протерувањето не помага за пронаоѓање на оние кои се виновни. Меѓутоа, се додава и дека Москва е отворена за разговори. Сенаторот Константин Козачов, шеф на Комисијата за надворешна политика на Советот на Федерацијата, изјави дека Вашингтон одлучил „да протера 60 руски дипломати од САД и 60 американски дипломати од Русија“, алудирајќи на реакцијата од Русија која се очекува. Откако Вашингтон го затвори рускиот конзулат во Сиетл, во московскиот печат се дискутира околу тоа кој американски конзулат во Русија сега треба да биде затворен - во Владивосток, Екатеринбург или Санкт Петербург.
Јури Швиткин, заменик претседател на Комисијата за одбрана во Думата, смета дека конфронтацијата е закана за „глобалната стабилност“. Конфронтацијата, според него, е „унилатерална“ и доаѓа од САД и Велика Британија. Комунистичкиот пратеник во Думата, Леонид Калашников, за најновата ескалација на дипломатско ниво рече дека такво нешто се случува почесто пред почеток на војна. Европејците, нагласи Калашников, „не можат да го надминат погрешно сфатеното чувство на солидарност“.
Владимир Путин: Патот до моќта
Владимир Путин е избран за претседател на Русија во четвртиот мандат. Поглед кон подемот на Путин од нискорангиран агент на КГБ до незапирлива политичка сила.
Фотографија: Reuters/D. Mdzinarishvili
Кадет на КГБ
Роден во Санкт Петербург во 1952, Путин се пријави во советската раразузнувачка служба КГБ веднаш по завршувањето на правниот факултет во 1975. Негова прва задача бил надзорот на странски државјани и вработени во конзулатите во родниот град, тогаш со името Ленининград Потоа замина на служба во Дрезден, источна Германија. Тој наводно запалил стотици документи на КГБ по падот на Берлинскиот ѕид.
Лево на фотографијата, младиот Путин стои до тогашниот градоначалник на Санкт Петербург, Анатоли Собчак. Тој му беше професор на Путин и го назначи за свој советник за меѓународни прашања. И покрај корупцискиот скандал на почетокот од службата, Путин не ја загуби работата, токму поради пријателството со Собчак.
Фотографија: Imago/ITAR-TASS
Метеорски подем
Путин набргу се префрли во Москва. Во 1997 рускиот претседател Борис Елцин му додели среднорангирана функција во неговата администрација- позиција која Путин ќе ја искористи за да создаде важни политички пријателства, кои ќе му бидат од полза во наредните децении.
Фотографија: picture alliance/AP Images
Смртта на пријателот
Путин беше длабоко потресен од смртта на Собчак во 2000 година. Откако ученикот политички го надмина својот учител, Собчак стана гласен поддржувал на кандидатурата на Путин за претседател на Русија. Една година претходно, Путин ги искористи своите врски за да бидат отфрлени обвинувањата против Собчак за проневера.
Фотографија: picture-alliance/dpa/S. Chirikov
Привремен претседател
Во јуни 2000 година, Борис Елцин поднесе оставка, отстапувајќу му на премиерот да стане привремен лидер на државата. За време на успешната претседателска кампања, повторно излегоа на површина обвинувањата за корупција против Путин од времето на неговата служба во Санкт Петербург. Марина Салје, пратеничката која ги изнесе обвинувањата, беше замолчена и принудена да го напушти градот.
Фотографија: Imago/ITAR-TASS
Тандемократија
Кога Путин уставно беше спречен да се кандидира за трет последователен мандат во 2008 година, премиерот Дмитри Медведев се кандидираше на негово место. Кога Медведев беше избран, тој го назначи Путин за премиер. Тоа доведе до критики за „тандемократија“ во Москва и многумина беа убедени дека Медведев е марионета на Путин.
Фотографија: Imago/ITAR-TASS
Победа
Во март 2018 година, Владимир Путин е избран за руски претседател во четврти мандат. Путин ќе биде на власт и во наредните шест години, со оглед дека претседателскиот мандат претходно беше продолжен на шест години. Избоrите беа засенети од обвинувањата за нерегуларности и манипулации, како и од фактот дека немаше вистинска опозиција на Путин.
