Седуммина напаѓачи на Села добија од 10 до 13 години затвор
БГ
5 јули 2018
Седум лица идентификувани како напаѓачи на пратеникот на Зијадин Села при упадот во Собранието на 27 април 2017 година, беа прогласени за виновни и добија затворски казни во висина од 10 до 13,5 години.
Фотографија: Reuters/O. Teofilovski
Реклама
Напаѓачите на пратеникот и лидер на партијата Алијанса на Албанците, Зијадин Села добија затворски казни во времетраење од 10 до 13,5 години на денешното изрекување на пресудите во Кривичниот Суд во Скопје. Настанот се случи за време на крвавиот упад во Собранието на 27 април 2017 година.
Највисока казна - од 13 години и шест месеци - судот му одреди на Никола Војминовски. На шест месеци помалку, односно на по 13 години затвор се казнети Кире Ѓорѓиевски и Александар Јаневски. На по 10 и пол години затвор казнети се Коста Делов, Андреј Мицов, Николче Димитриевски и Оливер Ошавковски.
Обвинетите со умисла се обиделе да го лишат од живот Зијадин Села, рече судијката која го водеше предметот. Отежнувачка околност за сите седуммина обвинети, според судијката, е и тоа што делото било извршено со влез во Собранието на Република Македонија.
Пратеникот Зијадин Села се здоби со тешки телесни повреди по нападот во СобраниетоФотографија: DW/P. Stojanovski
Обвинителството побара на сите седум обвинети да им се продолжат мерките притвор и куќен притвор до започнување со извршување на казната. Според обвинителството, опасноста од бегство на обвинетите сега е посилно изразена, исто како и опасноста од повторување на делото.
За обидот на убиство на Села првично обвинети беа десет лица. Едно лице беше ослободено од обвинението поради недостаток на докази, додека две други лица претходно добија казни затвор од три, односно една година и два месеца.
Мачна вечер на насилство во Скопје
01:45
This browser does not support the video element.
Неколкумина од обвинетите читањето на пресудата го проследија со солзи во очите.
На крајот на март годинава, Јавното обвинителство соопшти дека гони 28 лица за делото терористичко загрозување на уставниот поредок и безбедноста поради крвавиот упад во Собранието на РМ на 27 април минатата година. Обвинителството тогаш оцени дека упадот во Собранието била организирана и координирана акција чија цел, меѓу другото, била и ликвидација на тогашниот опозициски лидер и актуелен премиер Зоран Заев. Меѓу обвинетите е и поранешниот директор на Бирото за јавна безбедност Митко Чавков, како и неколкумина пратеници на ВМРО-ДПМНЕ.
Сведоштва за „крвавиот четврток“ во македонскиот парламент
Невидени хаотични слики: Откако мнозинството пратеници го избра пратеникот на ДУИ Талат Џафери за претседател на Собранието, на противење на пратениците од ВМРО ДПМНЕ, во законодавниот дом упадна толпа насилни луѓе.
Фотографија: Reuters/O. Teofilovski
Навала пред вратите на Парламентот
По изборот на Талат Џафери за нов претседател на Парламентот, од иницијативата „За заедничка Македонија“ ги повикаа граѓаните да излезат уште помасовно на протест, со цел да ја спасат државата од, како што истакнаа, влегување во сценарио од кое нема враќање назад. Толпата почна да притиска кон вратите на Собранието за да влезе во него.
Фотографија: Reuters/O. Teofilovski
Слабо присуство на полицијата
Неколку големи групи граѓани влегоа во парламентарната зграда, во пленарната сала, во фоајето и во други простории на парламентот, откако полицијата не го спречи првиот бран од граѓани кои протестираа против изборот на нов претседател на Собранието.
Фотографија: Reuters/O. Teofilovski
Незапирливо „заземање“ на Парламентот
Меѓу оние кои упаднаа имаше и маскирани лица со качулки, кои фрлаа столици во собраниските простории и медиумска опрема.
Фотографија: Reuters/O. Teofilovski
„За заедничка Македонија“ во Собранието
Во закондавниот дом завладеа хаос. Тука беа организаторите на иницијативата „За заедничка Македонија“, тука беа и министри и пратеници на ВМРО-ДПМНЕ.
Фотографија: picture-alliance/dpa/B. Grdanoski
Знамиња и песни
Дел демонстранти ја „зазедоа“ и Пленарната собраниска сала, каде што пееја песни и вееја знамиња.
Фотографија: picture-alliance/abaca/B. Ademi
Напади врз пратениците на СДСМ
Демонстранти навлегоа и во прес-центарот, каде што беа пратениците на СДСМ и ДУИ и почнаа да ги тепаат со столови и со сè што ќе им дојде до рака. Крвнички напаѓани беа Зоран Заев, Дамјан Манчевски, Максим Димитриевски, Радмила Шеќеринска, Хари Локвенец, Зијадин Села. Полиција немаше.
Фотографија: picture-alliance/abaca/N. Batev
Полицијата се „разбуди“
По повеќе од еден час по почетокот на инцидентите, полицајци влегоа во Собранието и се обидоа да ги извлечат пратениците од прес-центарот, но беа избркани од толпата што ги држеше како заложници. Толпата се забарикадира во прес-центарот.
Фотографија: Reuters/O. Teofilovski
Евакуација на повредените пратеници
Некаде пред 22 часот дојдоа и специјалци, па почнаа да се обидуваат да ги вадат повредените од забарикадираниот прес-центар.
Фотографија: Reuters/O. Teofilovski
Извлечени пратениците
Кратко пред полноќ пратениците од парламентарното мнозинство беа извлечени од Собранието, а пред него и понатаму останаа насобраните демонстранти.
Вкупно стотина лица се повредени, од кои четворица се пратеници. Целото Собрание е демолирано, тврдат новинари, од кои дел исто така беа напаѓани.
Фотографија: Reuters/O. Teofilovski
Шатори пред Собранието
Припадници на движењето „За заедничка Македонија“, кое ги предводи демонстрациите, кои синоќа прераснаа во безредија и насилство, поставија шатори пред Собранието и најавија дека ќе останат таму „колку што е потребно“, за да ја „одбранат Македонија“.
