Смеете ли да ги нарекувате луѓето од Северна Африка „Нафрис“? Полицијата во Келн го стори тоа, но се работеше за код за внатрешна употреба. Проблемите во моментов се далеку поголеми од тоа, смета Јенс Турау
Реклама
Да почнеме со фактите. На Новогодишната ноќ, келнската полиција сакаше да спречи фијаско како претходната година, за што беа со право критикувани: во 2015 година стоеја одстрана, и најпрво не ги ни забележаа стотиците млади луѓе- повеќето од Северна Африка, кои сексуално напаѓаа жени, а во некои случаи се обидоа и да ги силуваат.
Токму затоа во 2016 реонот околу Катедралата беше претворен во тврдина чувана од 1,700 полицајци. Стотици млади луѓе беа контролирани, на многумина им беше забранет пристапот, а околу 100 беа приведени. Полицијата преку социјалните мрежи откри дека северно-африканци планирале повторно да се сретнат во Келн и да го сторат истото од минатата година, и ја искористи информацијата за да го спречи тоа.
Избрзан твит
А потоа, пред полноќ, полицијата желна за признание твитна „Стотици Нафрис проверени на главната железничка станица. Деталите следат“.
И што се Нафрис? Се работи за внатрешен полициски код за престапници или потенцијални престапници од Северна Африка. Звучи омаловажувачки, но твитот беше постиран во брзање. Полициски портпарол се извини за ненамерното користење на називот. Полицијата беше под огромен притисок, а нејзината најважна задача беше да спречи повторување на минатогодишните настани.
Реакциите на твитот беа исто толку предвидливи колку што се и здодевни. Партијата на Зелените смета дека називот не е прифатлив и прашува дали полицијата вршела расно профилирање, што е всушност забрането. Баварската ЦСУ ја брани полицијата, а шефот на келнската полиција ги отфрли обвинувањата за расизам. На Твитер, Зелените привлекоа бран критики и омраза откако понудија далеку полош назив за „младите луѓе кои изгледаат како да се од Северна Африка“, наместо името „Нафрис“.
И што научивме од ова искуство?
Секако дека не сите луѓе од Северна Африка уживаат да малтретираат жени. Но пред една година, мнозинството од престапниците во Келн беа со такво потекло, и апсурдно е тоа да се негира. Затоа полицијата се фокусираше на оваа група- што друго требаше да сторат? Полицијата исто така се извини за непромислениот твит, и тоа е добро. Всушност, тие завршија добра работа, и луѓето треба да се опуштат.
Мнозинството од луѓето мислат дека новинарите само бараат конфликти и судири. А ниту еден извештај не е доволно неконсеквентен за да не може да се искористи и да се претвори во скандал. Ова е мојот контрапредлог: Ајде да ги оставиме „Нафрис“ на мира и да се свртиме кон навистина важните вести?
10 причини да се вљубите во Келн
Уметност, култура и карневал.. Но, Келн има многу повеќе: старите зградите во градот раскажуваат за двеилјадигодишната историја, а тука се и бројните саеми, музеи и извонредниот ноќен живот.
Фотографија: Dieter Jacobi/KölnTourismus GmbH
Катедралата во Келн – буквално огромен споменик
Околу 20.000 луѓе дневно ја посетуваат катедралата во Келн, поради што таа се вбројува во најпопуларните туристички дестинации во Германија. Катедралата во Келн е изградена пред повеќе од 700 години, а беа потребни речиси исто толку години истата да биде изградена. Готското архитектонско дело се наоѓа на листата на светското наследство на УНЕСКО од 1996 година.
Фотографија: Udo Haake/KölnTourismus GmbH
Стариот градски центар – модерно историско место
Стариот градски центар за време на Втората светска војна беше речиси целосно уништен. Голем дел од предните фасади, на веќе постоечките куќи од 1960-те години, беа реконструирани во историски стил, како што е прикажано на сликата погоре, снимена на познатиот Фишмаркт во Келн. Во тесните улички на стариот градски центар може да се најде голем избор на таверни, ресторани и пивници.
Фотографија: Jens Korte/KölnTourismus GmbH
Дом на традиционалното келнско пиво
Луѓето во Келн најмногу уживаат во локалното пиво „Kölsch“. Ова пиво смее да се произведува само во Келн и блиската околина. Се сервира во „Kölschstange“ – висока и тенка чаша од 200 мл. Се конзумира најдобро во придружба со некој од локалните специјалитети како што се „Himmel und Äad“, што на локалниот диjалект значи рај и земја – ова јадење се состои од пире, каша од јаболко и крвав колбас.
Фотографија: Privatbrauerei Gaffel
Музеи – од антички до модерни времиња
Во Келн, љубителите на уметноста и културата се соочуваат со проблеми при изборот на галерија или музеј за посета - бидејќи во градот ги има безброј. Музејот Лудвиг, на пример, има изложби на модерна уметност, на поп арт и експресионистички дела. Во Келн секој ќе го најде „својот“ музеј бидејќи има сѐ - од времето на антички Рим до модерна технологија и чоколада.
Фотографија: picture-alliance/dpa/O. Berg
Цркви – сведоштва за поранешната слава
Во средниот век, Келн бил најголемиот град во светот каде се зборува германски, а бил и важен христијански центар. И денес, многу од светите градби во градот, вклучително и 12 романескни цркви, се сведоци за историската религиска важност на Келн. Св. Марија во Капитол е најголемата од нив, а е изградена на локацијата на антички римски храм. Денешната црква е изградена во 11 век.
Фотографија: Jens Korte/KölnTourismus GmbH
Паркот на Рајна – огромно игралиште
Спроти катедралата во Келн, на брегот на Рајна, се наоѓа 40-хектарскиот Рајнпарк. Изграден е во 1912 година, а во 2007 година беше прогласен за најдобар парк во Германија. Огромните тревни површини во лето служат како игралишта за фудбал, а штом зајде сонцето се користат и за ноќни дружења со скара. Со жичарницата над реката Рајна, може да се стигне од паркот до Зоолошката градина во Келн.
Фотографија: picture-alliance/dpa/O. Berg
Карневал – петтото годишно време во Келн
Келнскиот карневал е еден од најголемите и најдобро познати улични карневали во светот. За време на карневалот треба да ги знаете овие важни зборови: „Алаф“ – поздрав кој се користи на карневалот и може да биде извикан во секое време; „Камеле“ се нарекуваат карамелите и бонбоните кои се фрлаат за време на уличните паради и „Бицје“ - мал бакнеж кој слободно се подарува, некогаш дури и на непознати.
Фотографија: picture-alliance/dpa/F. Gambarini
Саем – од Гејмском до Арт Келн
Келн е ширум светот познат како град на саеми. На Гејмском, годишниот саем за компјутери и видео игри, компании од цел свет ги презентираат своите најнови хардверски и софтверски производи. На саемот АртКелн, кој инаку е најстар саем за уметност во светот, може да се најде парче уметност за сечиј џеб. Фотокина, еден од најважните саеми за фотографија во светот, во Келн се одржува секои две години.
Фотографија: Koelnmesse GmbH
Град со „отворен ум“
Келн е и град на толерантноста - затоа и не е изненадување што градот е „упориште“ на хомосексуалците. Еднаш годишно тука се одржува КолонПрајд, двонеделна манифестација за поддршка на правата на геј и трансродовата заедница, која исто така е и најголемата во Европа. Врвот на забавата на геј сцената е тридневната „Кристофер Стрит Деј“ парада која се одржува во првиот викенд во месецот јули.
Фотографија: picture alliance/R. Goldmann
Рајна – трговска и рекреативна рута
Еден од „бонусите“ на Келн е и неговата локација покрај Рајна - најдолгата река во Германија. И самите Римјани биле свесни колку е прикладна оваа локација кога на територијата на денешен Келн, во 19 година п.н.е ја основале првата населба. Денес, жителите и посетителите на Келн, можат да направат мала екскурзија со брод или да изнајмат кану и да добијат уникатен поглед на градската архитектура.