Од Здружението на новинари изразуваат незадоволство од начинот на кој Владата ги менува медиумските закони, истакнувајќи дека требало и тие да бидат консултирани за ваквата одлука.

Претседателот на ЗНМ, Насер Селмани, посочи дека во ниту една демократска земја медиумските закони не се носат без јавна расправа и без присуство на опозицијата во Парламентот, поради важната улога што медиумите ја имаат во секое демократско општество.

„Со ваквото однесување на владата, кое е во спротивност со европските стандарди и практики, не може да се подобри и така влошениот имиџ на земјата во светот поради непочитување на слободата на изразувањето и слободата на медиумите. За драматичното паѓање на Македонија на светските ранг листи за слобода на изразување, владата одговорноста не треба да ја бара кај други, туку да сфати дека со нејзиното однесување во голема мера придонесува за ваквата состојба. Апелираме владата да ги повлече од собраниска процедура измените и дополнувањата на законот за аудио и аудиовизуелни медиумски услуги и да се даде можност на новинарските и медиумските организации да се произнесат за нив“, изјави Насер Селмани.

Селмани истакна дека во здружението сметаат дека владата не треба да го менува законот пред да почне да го применува. Според нив, од ваквиот потег очигледно е дека на некој не му се допаѓа тоа што два члена во програмскиот совет на МРТ треба да ги предлага ЗНМ, како мнозинско здружение.

„Со ваквото делување владата покажува дека ги менува сопствените закони кои не одат во прилог на нејзините интереси“, додава Селмани.