Револтираните демонстранти бараа оставка од Иванов поради неговата одлука за општ прекин на сите постапки против политичари и нивни соработници поврзани со прислушувањето и политичката криза. Настрада неговата канцеларија во центарот на Скопје.

Од канцеларијата на Иванов демонстрантите се упатија пред Собранието, откако патем го пробија полицискиот кордон. Една група се обиде оттаму да продолжи кон седиштето на ВМРО-ДПМНЕ, но беше спречена од полицијата.

Револтирани граѓани бараа од полицијата објаснување „кого штити?“ Во текот на целиот протест полицијата и демонстрантите постојано се надмудруваа - едните менуваа локација, другите веднаш ги разместуваа полициските ресурси.

„До вчера казнуваа луѓе што на диво продавале коприви за да можат да си купат парче леб, а сега ќе амнестираат некого за толкави криминали. Не може така“, изјави 62-годишниот Стојан Лазаревски за ДВ.

Откако не успеаја да го пробијат кордонот пред Собранието, група демонстранти повторно се вратија пред Канцеларијата на Иванов. Учесници во протестот извадија дел од мебелот и го запалија среде улица.

Полицијата овојпат одговори со употреба на сила. Според информациите, уапсени биле 13 лица, а десетици биле повредени. Очевидци на теренот велат дека полицијата не пребирала и удирала по сѐ што ќе ѝ се нашло на патот.

Економскиот аналитичар и член на Левица, Бранимир Јовановиќ, е меѓу приведените од полицијата. Нема официјална информација која е причината за неговото апсење. Фоторепортерите на теренот преку социјалните мрежи јавија дека полицијата брутално се пресметувала со сите.

Преку социјалните мрежи веќе се најавуваат нови протести. #Протестирам и други граѓанските здруженија велат дека нема да запрат додека Иванов не поднесе оставка од функцијата. ЕУ и САД веќе изразија загриженост за безбедносната состојба во земјата.