Израелската копнена воена операција во Појасот Газа од синоќа е во полн ек. Армијата го бомбардира појасот од воздух и од море, како и од тенковите кои се стационирани покрај границата. Бројот на жртвите меѓу Палестинците продолжи да расте и достигна 260 луѓе од почетокот на нападите пред 11 дена. Израел денеска потврди дека еден војник загинал во борбите со припадниците на Хамас, додека меѓу 19-те загинати Палестинци има и едно петмесечно бебе.

Палестинското радикално исламистичко движење Хамас преку свој портпарол соопшти дека израелската копнена операција во Појасот Газа ќе има ужасни последици и се закани дека Израел ќе плати висока цена за таквиот непромислен чекор.

Израелската армија објави дека операцијата во Појасот Газа нема за цел да го собори од власт Хамас, туку да нанесе удар на „инфраструктурата“ и да се заштити цивилното израелско население. Во соопштението на канцеларијата на израелскиот премиер Бенјамин Нетанјаху се наведува дека цел на операцијата на израелската армија во Појасот Газа е да се уништат подземните тунели, што ги користат вооружени групи за влез на израелска територија. Целта на втората, копнена фаза на операцијата е да се нанесе удар на арсеналот на Хамас и објектите што се користат за истрелување ракети кон територијата на Израел.

Во соопштението се наведува дека во копнената офанзива учествуваат пешадиски единици, тенкови, инженерски единици, артилерија и разузнавачки единици, кои дејствуваат со поддршка од воздух и море. Израелската армија побарала од владата да дозволи дополнителна мобилизација на 18 илјади резервисти за проширување на копнената операција.