Автобусите со палестински затвореници го минаа контролниот пункт на Западниот Брег синоќа околу 21 часот по средноевропско време. Неколку конвои на автобуси на затворската служба, придружувани од припадници на полицијата, ристигнаа претходно на граничните премини кон територијата во Појасот Газа.

Никој од вчера ослободените затвореници, меѓу кои и шест жени, не бил осуден на доживотна затворска казна, ниту за убиство. Повеќето од нив и онака наскоро би биле ослободени, за разлика од 477 ослободени затвореници во првата фаза, од кои некои служеа доживотен затвор поради терористички напади.

Повеќето затвореници, односно 505 се пуштени на слобода на Западниот Брег преку граничниот премин Беитунија, каде беа собрани стотици Палестинци, кои ги чекаа своите блиски. Четириесет и еден затвореник е ослободен на граничниот премин Карем Шалом кон Појасот Газа. Двајца се пуштени од иточен Ерусалим, а двајца од Јордан, така што тие минаа преку граничниот премин на мостот Аленби кон таа земја.

Со тоа заврши размената на затвореници договорена меѓу Израел и Палестинците, со која Палестинците по пет години заробеништво го ослободија израелскиот војник Гилат Шалит, а Израел ослободи околу илјада палестински затвореници.

Автор: ЖА/АТ/дв/миа

Редактор: Ж.Ацеска