По смртта на осомничениот атентатор од Берлин, Анис Амри, истражните постапки продолжуваат со засилено темпо. Имал ли Амри мрежа на поддржувачи за нападот и при бегството?
Сојузниот јавен обвинител Петер Франк соопшти дека сега би морало итно да се разјасни, дали 24-годишниот Тунежанец имал помошници при подготвувањето и извршувањето на нападот врз божикниот панаѓур во Берлин како и мрежа на поддржувачи при бегството од Германија. Истотака истражителите сакаат да стекнат подетални сознанија за тоа по кој пат успеал да побегне Амри: „ Иако осомничениот атентатор е мртов, постапката за разјаснување на злосторството од страна на правната држава не завршува“, истакна германскиот министер за правда, Хајко Мас.
Истражните органи во Германија се убедени дека Анис Амри со голема веројатност е човекот, кој во понеделникот вечерта (19.12.2016) во Берлин со украден камиот влета во божикниот пазар на плоштадот Брајтшајд во центарот на Берлин. Притоа загинаа 12 лица а уште 53 се повредени, дел од нив и натаму се во животна опасност. Отисоци од прстите на Амри биле детектирани на камионот и на воланот на возилот.
Терористичката организација „Исламска држава“ објави видео, на кое може да се види осомничениот берлински атентатор. На снимката која трае неполни три минути Амри му се заколнува на верност на лидерот на џихадистичката милиција, Абу Бакр ал-Багдади. Автентичноста на видеото, кое најверојатно е снимено во Берлин, уште не е потврдена од независни извори. Исламска држава ја презеде одговорноста за нападот во Берлин уште во вторникот.
Експертите на Сојузната служба за борба против криминалот во меѓувреме пак ги идентификуваа сите жртви од нападот. Меѓу 12 загинати има 8 Германци, и по еден државјанин на Полска, Италија и Чешка.
Хронологија: терористички заговори во Германија
Во неколку наврати во последните 18 месеци, полицијата успеа да спречи терористички напади и заговори во Германија. Земјата стана цел на исламските милитанти во Европа. Ова се досегашните обиди
Фотографија: Reuters/M. Rehle
Лајпциг, октомври 2016
Полицијата во Лајпциг го уапси 22-годишниот сириски бегалец Џабер ал Бакр по дводневна потрага откако беше откриен експлозив и опрема за производство на бомби во неговиот стан во Кемниц. Беше осомничен за планирање напад врз аеродромот во Берлин. Два дена подоцна, беше пронајден обесен во затворската келија.
Фотографија: picture-alliance/dpa/S. Willnow
Ансбах, јули 2016
Во јули годинава, „Исламската држава“ ја презеде одговорноста за два напади извршени од баратели на азил. 15 луѓе беа повредени во вински бар во близина на влезот на музички фестивал во баварскиот град Ансбах, откако сириски бегалец активираше бомба. Напаѓачот загина во атентатот.
Фотографија: picture alliance/AP Photo/D. Karmann
Вирцбург, јули 2016
17- годишен барател на азил вооружен со секира и нож изврши напад во регионален воз кај Вирцбург. Пет лица беа тешко повредени, а напаѓачот беше застрелан од полицијата. Германските власти соопштија дека тинејџерот бил осаменик инспириран од „Исламската држава“, но не бил член на мрежата.
Фотографија: picture-alliance/dpa/K. Hildenbrand
Диселдорф, мај 2016
Три осомничени членови на „Исламската држава“ беа уапсени во три германски покраини. Власатите велат дека двете лица планирале да се разнесат со експлозив во центарот на Диселдорф, додека третиот напаѓач и четврто лице кое беше уапсено во Франција, планирале да отворат оган врз случајните минувачи.
Фотографија: picture-alliance/dpa/M. Hitij
Есен, април 2016
Полицијата уапси три лица откако бомба повреди три лица во храм на Сиките во Есен. Бомбата беше активирана по свадбена прослава, уништувајќи ја внатрешноста на објектот. За нападот е осомничен 16- годишник кој и се предаде на полицијата, додека уште еден малолетник беше уапсен во неговиот дом.
Фотографија: picture-alliance/dpa/M. Kusch
Хановер, февруари 2016
Германката со мароканско потекло Сафиа С. е обвинета за напад со нож врз полицаец на главната железничка станица во Хановер. Оваа 16- годишна девојка била мотивирана од „членови на Исламската држава во Сирија да го изврши нападот“, вели јавниот обвинител Симон Хенрикс.
Фотографија: Polizei
Берлин, февруари 2016
Во неколку одвоени рации низ државата, полицијата уапси тројца Алжирци осомничени за врски со „Исламската држава“ и за планирање терористички напади во Берлин. Покраинското јавно обвинителство вели дека постоеле „конкретни“ планови за напад во главниот град.
Фотографија: Reuters/F. Bensch
Оберурсел, април 2015
Локалната велосипедска трка беше откажана откако полицијата откри дека е можна цел на исламски терористички напад. Еден 35-годишен маж со турско потекло и неговата 34-годишна сопруга беа уапсени под сомнение дека планирале напад. Во нивниот дом полицијата пронајде материјал за изработка на бомби.
