Истражување: Германците се оптимисти и покрај короната
ЕМФ | агенции
19 ноември 2020
Пандемијата на корона не влијае многу врз задоволството од животот на Германците.
Фотографија: picture alliance/dpa/M. Schutt
Реклама
И покрај рестрикциите во општествениот и економскиот живот, Германците остануваат главно оптимисти, покажа најновиот „Атлас на среќата 2020“. Нивото на среќа, и покрај пандемијата, е намалено за само 6% во споредба со минатата година (кога беше на рекордно високо ниво), покажува најновото истражување.
Нивото на среќа, на скалата од 1 до 10 поени, годинава е на 6,74, додека лани беше на 7,14 поени.
Мнозинството граѓани очекуваат наредната година да бидат повторно посреќни. Околу 80% од испитаниците изјавиле дека се среќни што во време на пандемија живеат во земја како Германија. Половина од испитаниците во кризата предизвикана од пандемијата гледа и позитивен развој, како во делот на зајакнување на соживотот во општеството. 70% од испитаниците, пак, се уверени дека корона-кризата ќе биде поттик за создавање поодржлив економски систем.
Рент-А-Фин
01:45
This browser does not support the video element.
Најсреќните луѓе во Германија живеат, исто како и досега, на северот од земјата. На врвот се жителите на покраината Шлезвиг Холштајн, заедно со Хамбург, додека на трето место е покраината Баден Виртемберг, а потоа следува Северна Рајна Вестфалија. Најнесреќни се луѓето кои живеат во покраината Тирингија.
„Атласот на среќата“ се прави по налог на Германска пошта, а го мери индивидуалното задоволство од животот врз основа на фактори како работа и плата, здравје и старот, семејство, безбедност, слободно време, медиуми и економски пораст.
Амајлии и ритуали за среќа
Атласот на среќата во Германија покажува дека најсреќните Германци живеат во покраината Шлезвиг Холштајн. Онаму каде нема толку среќни луѓе, можеби може да помогнат некои амајлии, талисмани или ритуали за среќа.
Фотографија: DW / Nelioubin
Потковица
Потковицата завртена со отворот нагоре, според верувањето во Германија, би требало да ја „фати“ среќата и да им го блокира патот на лошите духови. Затоа, на многу порти има прицврстени потковици. Според едно друго верување, потковицата значи „C“, односно првата буква од „Christus“ (Христос).
Фотографија: DW / Nelioubin
Прасе
Свињата во античко време во цела Европа била симбол на благосостојба и богатство, а Германите ја сметале за свето животно. Денес прасињата за среќа се прават од марципан и се комбинираат со други симболи за среќа, како детелината со четири листа или оџачарот.
Фотографија: Fotolia/meerisusi
Валкана работа за среќа
Порано, затнувањето на каминот се сметало за голема несреќа. Зашто, ниту можело да се готви ниту да се грее - и шпоретот и печката останувале студени. Помош можеле да пружат само оџачарите, кои го чистеле каминот. Така среќата повторно се враќала.
Фотографија: picture alliance/dpa
Небесниот гласник со точки
Малиот инсект со точки се вика бубамара по Света Марија, мајката Исусова, а така ја крстиле селаните. Таа дневно јаде повеќе од 100 лисни вошки и се смета за важн природен уништувач на штетници. Тоа за земјоделците претставува небесен дар. Во Европа најраспространета е бубамарата со седум точки кои, според народното верување, ги симболизираат седумте доблести на Марија.
Фотографија: Fotolia/ K.-U. Häßler
Отровна печурка за среќа
Научниците спорат околу тоа дали печурката Amanita muscaria, на германски „мувна печурка“, се вика така затоа што убива муви или затоа што од нејзе луѓето „летаат“ во транс. Застапена е многу во детските песнички и приказни. Притоа, печурката е многу отровна и дури и конзумирање на мали количества предизвикува силни халуцинации. Според народното верување, печурката заштитува од вештерки и демони.
Фотографија: Fotolia/Ideen
Азиски мудрости
Со едно гризнување до мудра изрека - традицијата на кексите за среќа потекнува од источна Азија. Корените на оваа оваа традиција се во Кина, но и во Јапонија. Иселениците ги „извезле“ кексите за среќа во 19. век во САД, од каде потоа тие си го наоѓаат својот пат до Европа и Германија.
Фотографија: picture-alliance/ dpa/dpaweb
Замисли желба
Метеорите во многу земји се сметаат за магичен настан. Кој ќе види метеор, треба да ги затвори очите и да си замисли желба, но не смее да каже што замислил! Зашто, само ако замисленото остане лична тајна, може и да се исполни. Според една христијанска легенда, метеорите се фитили кои паѓаат на Земјата кога ангелите ги чистат небесните свеќи.
