Ден на жалост во Италија - земјата се простува од загинатите во земјотресот со комеморација во катедралата во Асколи Пичено. Спасувачите сѐ уште трагаат по преживеани.
Фотографија: Reuters/A. Di Loreto
Реклама
Три дена по тешкиот земјотрес кој ја погоди Италија, во Асколи Пичено се одржа комеморација за жртвите. Меѓу присутните беа и претседателот на државата Серџо Матарела и премиерот Матео Ренци. Сите знамиња на јавните објекти во земјата се на половина копје.
Во земјотресот загинаа повеќе од 280 луѓе, од кои најмалку 220 во местото Аматриче. Во ова место ќе има посебна комеморација во вторник, на која исто така е најавено присуство на премиерот Ренци. Комеморацијата најверојатно ќе се одржи под отворено небо, со оглед на тоа што во Аматриче веќе нема ниту една црква. Градоначалникот на Аматриче Серџо Пироци изјави дека и покрај тоа што нема црква, загинатите имаат право да бидат закопани во својата општина. Тој е уверен дека местото повторно ќе се изгради. „Ако граѓаните не заминат, нема да замине ниту градоначалникот. Градоначалникот денеска на Италија, светот и пред сѐ на Аматриче им порачува: ние остануваме овде, зашто нема ноќ која е толку долга што на сонцето ќе му забрани за изгрее. Сигурен сум дека Аматриче повторно ќе воскресне.“
Спасувачите сѐ уште не губат надежФотографија: Getty Images/C. Court
Дел од загинатите во земјотресот сѐ уште не се идентификувани. Освен тоа, повредени се околу 400 лица, а најмалку 2500 останаа без покрив над главата. До денеска нема официјален број на лица кои се водат како исчезнати. Спасувачките екипи сѐ уште не губат надеж и и натаму трагаат по преживеани. Досега од под урнатините живи беа извлечени повеќе од 230 луѓе.
Земјотрес во Италија: пред и потоа
Аматриче пред земјотресот важеше за едно од најубавите село во Италија. Сега е речиси целосно разурнато. Фотографиите пред и по земјотресот го прикажуваат целиот обем на катастрофата.
Прво идилично село - потоа купишта урнатини
Живописното село Аматриче е едно од местата кои се најмногу погодени од земјотресот. На 24 август, нешто по 03:30 часот , жителите на Аамтриче беа разбудени од голем потрес. Она што претходно беше идилична општина, сега е куп урнатини. Ако од овде се погледне кон десно...
Урнати цркви
... ќе се види што остана од црквата Киеза ди Сант'Агостино. Многу оштетена е и базиликата Сан Франческо со фрески од 14. и 15. век.
Без покрив над главата
Полициската станица во Акумоли - градоначалникот Стефано Петручи соопшти дека 2500 луѓе веќе немаат покрив над главата. Ниту една куќа не е безбедна за живеење. „Мора да организираме шатори за целото население“, изјави Петручи за италијанската агенција Анса.
Многу затрупани
Според официјалните податоци, во земјотресот загинале над 280 луѓе. Стотици се повредени. Шефот на Службата за цивилна заштита Фабрицио Курчо изјави дека што се однесува до бројот на жртвите, земјотресот може да има „уште полоши димензии од оној во Л'Аквила“ пред седум години. Тогаш загинаа 309 луѓе.
Во музеј од солидарност
Вратата на историскиот музеј во Арквата дел Тронто по земјотресот нема штук (мешавина од песок, гипс и вода со која се прават фигури и орнаменти на фасадата, н.з.). Министерството за култура во Рим најави дека сите пари од влезници за музеите што ќе бидат собрани в недела (28.06), ќе бидат донирани за жртвите од земјотресот.
