Маскотите на фудбалските Мундијали треба да носат среќа и да ги претставуваат земјите-домаќини. Идејата е благородна, но понекогаш знаела да се врати и како бумеранг.
Фотографија: picture-alliance/L. Perenyi
Реклама
Маскотата на актуелното Светско првенство во фудбал во Русија се вика „Забивака“. Во слободен превод од руски тоа би значело нешто како „малиот голгетер". Забивака е сладок волк во фудбалски дрес. Во една анкета организирана меѓу руските граѓани во 2016. година, тој успеа да победи во битката против еден тигар и еден мачор за маскота на турнирот.
Според ФИФА, Забивака би требало да ја отелотворува забавната страна на фудбалот. И секако животното треба да поттикне продажбата на рекламниот материјал. Во градовите каде се игра првенството, волкот може да се види на секое ќоше.
Фотографија: Reuters/M. Shemetov
Како и на повеќето претходни Мундијали, маскотата и годинава е животно и има некаква врска со земјата-домаќин. Слично како и бразилската маскота Фулеко на претходното СП, или Закуми, леопардот со зелена боја од Мундијали во Јужна Африка, кој како и повеќето негови претходници беше заборавен набрзо по завршувањето на првенството.
Но, некои маскоти во досегашната историја на СП во фудбал успеваа да предизвикаат и големи реакции. Какви? Откријте во следнава галерија:
Мундијалски маскоти - за потсмевање
Од „Вили“ до „Голео“: во историјата на маскотите на СП некои од нив беа ненамерно смешни- па затоа и останаа во сеќавањето.
Фотографија: Getty Images/Bongarts/A. Hassenstein
„Вили“
Откако во 1966 година лавот истрча на сцената на СП, многу сметаа дека се работи за лоша шега. Значењето на животното отпрво не им беше јасно на сите. Но првата маскота во историјата на Светските првенства набрзо стана љубимец на публиката. Кога Англија конечно стана светски првак во сопствената земја, никој повеќе не се сомневаше дека маскотата им донела среќа.
Фотографија: picture-alliance/dpa
„Наранхито“
За Светското првенство во 1982 година Шпанците не избраа ни горд бик, ниту храбар матадор. Наместо тоа се појави овошка: Наранхито беше мал портокал во фудбалски дрес кој предизвикуваше потсмев. Но фигурата набрзо стана ѕвезда на бројни телевизиски емисии на шпанската телевизија и до денес им останува во сеќавање на многу Шпанци.
Фотографија: picture-alliance/dpa
„Чао“
Маскотата на Италијанците за Светското првенство во 1990 година не беше наменета за гушкање. Тоа беше првата дигитална маскота која требаше да го симболизира новото компјутерско време. Чао се состоеше од коцки во италијанските национални бои. Телото, нозете и рацете требаше да го содржат зборот „ITALIA“ - но за тоа беше потребна голема фантазија.
Фотографија: picture-alliance/dpa
„Тип и Тап“
За фудбалското СП во Германија во 1974 година се појавија две маскоти: Тип и Тап, две момчиња со црвени обравчиња, зајачки заби, преголеми копачки и рамни стомаци со германски дресови- не баш типично за германската репрезентација. Потсмевањето заврши со победата во финалето на Мундијалот.
Фотографија: picture-alliance/dpa
„Голео“
Ретко кој бил досега толку исмеван како маскотата на второто Светско првенство во фудбал во Германија во 2006 година: Голео и Пиле- лавот без пантолони и неговата фудбалска топка која зборува. Голео стоеше на секој меч покрај теренот. Изразот на неговото посрамотено лице и фактот дека немаше ниту гаќи, му донесоа само потсмев.
