Џихадистите на ИД се наоѓаат под екстремен притисок и загубија огромен дел од териториите со кои владееја во Ирак и во Сирија. Сега нивниот лидер, кој беше прогласен за мртов, во аудио-снимка ги повикува на истрајност.
Фотографија: Getty Images/AFP
Реклама
Терористичката милиција Исламска држава вчера објави наводна аудио-порака од нејзиниот лидер Абу Бакр ал-Багдади. Во неа, говорникот, кој би требало да е лидерот на ИД, ги повикува соборците кои во Сирија и Ирак ги губат позициите, да му пружат отпор на непријателот и покрај тешките воени порази.
„Водачите и борците на Исламска држава се свесни дека за победата и Божјата милост мора да се изборат со трпение и со пружање на отпор на неверниците без оглед на нивните сојузништва“, истакнува Ал-Багдади во пораката, која трае 46 минути, дополнувајќи: „Не се важни бројноста, опремата и силата на нeпријателот“.
Кога е снимен говорот на Ал-Багдади, кој беше објавен на интернет, не е познато, но во него тој се осврнува и на најнови случувања, како што е спорниот референдум за независност на ирачки Курдистан. Ова е прва наводна аудио-порака на лидерот на ИД од ноември 2016 година. Тогаш тој ги повика неговите приврзеници на одбрана на градот Мосул во Ирак. Исламска држава во 2014 година освои големи делови од Ирак и Сирија. Во јули истата година Ал-Багдади единствен пат се појави во јавноста и притоа го прогласи „калифатот“ на ИД.
Вашингтон, како што јавија агенциите, ја проверува и најновата снимка, но извори од американските разузнувачки служби истакнуваат дека нема причина да се сомневаат во нејзината веродостојност.
Инаку џихадистите на ИД се наоѓаат под екстремен притисок и загубија огромен дел од териториите со кои владееја во Ирак и во Сирија. Нивното упориште Мосул падна. Денеска, како што соопшти ирачката армија, започна и нападот врз нивниот единствен преостанат бастион во северен Ирак, градот Хавиџа. Терористичката милиција, наскоро би можела да го загуби и нејзиното последно големо упориште во Сирија - градот Рака, кој важи за главен град на ИД.
Што всушност претставува „Исламска држава“?
„Исламска држава“, покрај разорувањата во Ирак и Сирија, во вестите често се наоѓа и поради нејзината бруталност. Што е ИД и колку е моќна? Во продолжение ви претставуваме одговори на најчесто поставуваните прашања.
Што е „Исламска држава“?
Се смета дека „Исламска држава“ е фракција од терористичката организација Ал Каеда, т.е. сунитска милитантна група, за која се верува дека е формирана како одговор на недовербата и фрустрациите од неуспешното владеење на владите во Сирија и Ирак. На нивното знаме пишува „Мухамед е пророкот на Бог“ и „Нема друг бог освен Алах“ - фрази со кои се согласуваат сите муслимани, не само „ИД“.
Фотографија: AP
Каде е активна „Исламска држава“
Целта на „Исламска држава“ е формирање на „калифат“ - држава каде се почитуваат традиционалните вредности на исламот и шеријатското право. Поради нестабилноста на регионите во Сирија и Ирак, „Исламска држава“ успеа да освои и да стави под своја контрола тероитории во двете држави.
Што ја прави „Исламска држава“ различна?
Клучна разлика е бруталноста на „Исламска држава“ со која се влева страв кај противниците и цивилите - преку егзекуцијата со обезглавување и бруталното насилство. Лидерите на „ИД“ велат дека владеат со регионите кои ги освојуваат. Експертот за Средниот Исток, Шади Хамид за ПБС изјави: „Тие нудат социјални услуги. Управуваат со локалната власт. Обезбедуваат минимално ниво на право и поредок“.
Фотографија: gebphotography - Fotolia.com
„ИД“ во однос на останатите терористички организации?
„ИД“ е активна во Сирија и Ирак, но нигериската терористичка организација Боко Харам неодамна ја изрази својата поддршка. Тоа е како натпревар во суровост: додека Боко Харам е одговорна за 13.000 смртни случаи, „ИД“ е одговорна за најмалку 24.000 повредени или убиени. Ал Каеда се дистанцираше од „ИД“, а една од нејзините фракции наречена Нусра Фронт се бори против „ИД“.
Фотографија: Getty Images/A. Katib
Кои се следбениците на „Исламска држава“?
Нешто по кое се разликува „ИД“ се нејзините следбеници. Повеќе од 20.000 странски борци се придружија на групата, од кои повеќе од 4.000 доаѓаат од западна Европа и северна Америка. На сликата се прикажани државите од каде што потекнувааат најголемиот дел на борците. Најголем број борци - споредено со вкупниот број на жители на земјите, доаѓаат од мали земји како Шведска и Белгија.
Што преземаат западните влади против „Исламска држава“?
Од август 2014 година, коалиција предводена од САД спроведува воздушни напади против цели на „ИД“ во Сирија (1.422 напади) и Ирак (2.242 напади). Некои влади исто така беа активни во рамките на нивните држави: Германија ќе процесуира најмалку 30 осомничени милитанти кои се вратиле од Сирија, додека Саудиска Арабија уапси 93 осомничени милитанти во април 2015 година.
