Кандидатите за наследници на Меркел го осудија национализмот
БГ/ ДПА
24 јуни 2021
Тројцата водечки кандидати за наследници на Ангела Меркел на функцијата канцелар, по изборите во Германија закажани за наесен, денеска отворено застанаа во одбрана на ЕУ и нејзините идеали.
Фотографија: Kay Nietfeld/dpa/picture alliance
Реклама
Во критички интониран говор, главниот кандидат на партијата на Меркел на изборите потсетуваше како советската блокада на Западен Берлин ја покажала важноста на меѓународната соработка.
„Тоа беше напад врз слободниот свет“, рече Армин Лашет пред пратениците во Бундестагот потсетувајќи на 73 годишнина од почетокот на блокадата. Тогашниот СССР ги затвори сите приоди до Западен Берлин, а блокадата која траеше речиси една година беше надмината благодарение на огромниот напор на западните сојузници кои со авиони пренесуваа основни намирници и стоки до опколениот град во операцијата наречена Берлински воздушен мост.
„Воздушниот мост беше отелотворување на испружената рака на САД, Велика Британија, Франција и други земји“, рече Лашет, кој е актуелен премиер на најбројната германска покраина Северна Рајна Вестфалија и наследник на Меркел на кормилото на конзервативната ЦДУ.
„Тоа ни покажа дека кога либералните демократии работат заедно, тогаш нема шанси за поделби и судири“, рече тој.
Лашет остро ја нападна и радикалната Алтернатива за Германија, која неодамна усвои програма која вклучува заминување од ЕУ.
„Потребна ни е повеќе Европа од било кога“, рече тој, обвинувајќи ја АфД дека им наштетува на германските интереси.
„Нема да дозволиме еден смртоносен вирус, ниту пак ширењето анти-европско расположение и скепса, и секако не популисти и националисти, да ја уништат оваа Европа“, рече Лашет.
Кон поддршката за ЕУ се приклучија и кандидатите за канцелар на Социјалдемократите, Олаф Шолц, и на Зелените Аналена Бербок. Шолц ја поздрави одлуката на ЕУ за заедничко позајмување пари- идеја која Германија долго ја отфрлаше- за потребите на фондот за опоравување од пандемијата, но ја повика ЕУ да најде решенија за политичките проблеми, вклучително и за миграцијата.
Избори во Германија 2021: Ова се потенцијалните наследници на Ангела Меркел
Шест партии веројатно ќе бидат претставени во германскиот парламент, Бундестагот, по гласањето на 26 септември. Ова се нивните водечки кандидати кои ќе ги претставуваат партиите за време на кампањата.
Армин Лашет (ЦДУ)
Армин Лашет е претседател на Христијанско-демократската унија и е актуелен премиер на најбројната покраина во државата. Конзервативците традиционално го потценуваа жовијалниот 60-годишник кој е познат по својата верба во интеграција и компромис. Но, неодамна, неговите либерални инстинкти го натераа да си го погази зборот во повеќе наврати за време на пандемијата на коронавирусот.
Фотографија: picture-alliance/dpa/G. Fischer
Аналена Бербок (Зелени)
На 40-годишна возраст, Аналена Бербок е копретседател на Зелените уште од 2018 година. Правник со диплома по меѓународно јавно право од Лондонската школа на економија, нејзините поддржувачи ја сметаат за стабилна личност со добро око за детаљ. Нејзините опоненти го посочуваат недоволното искуство во државнички работи.
Фотографија: picture-alliance/dpa/M. Kappeler
Олаф Шолц (СПД)
Запаѓајќи во уште подлабока дупка по секои избори, Социјалдемократите (СПД) одлучија да кандидираат реалист, наместо радикал како нивен шпиценкандидат во 2021. Министерот за финансии Олаф Шолц, поранешен градоначалник на Хамбург и заменик на Меркел во Владата, го сметаат за здодевен технократ. Многумина се сомневаат дека 62-годишникот ќе ѝ донесе нова енергија на партијата.
Фотографија: Imago Images/R. Zensen
Кристијан Линднер (ФДП)
Денес 42-годишен политичар секогаш желен за публицитет, Кристијан Линднер е во партијата на Либералите уште од својата 16 година, а ја предводи од 2013. Тој доаѓа од Северна Рајна Вестфалија и има студирано политички науки. Неговата желба е по изборите во септември да влезе во коалициска влада, по можност со ЦДУ/ЦСУ. Но прво неговата ФДП ќе мора да го мине изборниот праг од 5 проценти.
63-годишниот Дитмар Барч и 39- годишната Жанин Вислер одлично се надополнуваат. Барч е од источна Германија, прагматичар кој ја предводи пратеничката група од 2015 година. Радикалната левичарка Вислер е од западна Германија и е копретседател на партијата од февруари годинава. Таа ги претставува радикалните левичарски позиции како крај на воените мисии во странство и забрана за извоз на оружје.
Копретседателот Тино Чрупала, 46, ѝ се приклучи на Алтернатива за Германија (АфД) во 2015., привлечен од нејзината антиимигрантска платформа. Овој сликар од Саксонија е пратеник од 2017 година и ѝ дава поддршка на радикалната десница, но со далеку поумерен јазик. Алис Вајдел е 42-годишна економистка која ја предводи пратеничката група иако сопартијците ја критикуваат дека не сака многу да работи.
Фотографија: Kay Nietfeld/dpa/picture alliance
6 фотографии1 | 6
Говорејќи за време на парламентарната дебата за ЕУ, Бербок рече дека Унијата мора да пронајде „јасен јазик“ во однос на нарушувањата на човековите права меѓу своите членки. Таа ги критикуваше новиот закон во Унгарија со кој се ограничува издавањето материјали кои наводно промовираат хомосексуалност, како и односот на хрватските власти кон мигрантите на границата.
