Пратеникот на Беса, Кастриот Реџепи, по кој партиите од опозицискиот блок трагаат цел ден, објави видео на социјалната мрежа Фејсбук, на кое порача дека е добро и дека откако ќе поминат заканите ќе раскаже се што се случило. 

„Добар сум, не се грижете за мене и им благодарам на сите за поддршката и разбирањето на моите ставови кои се во насока на зачувување на интересите на државата и евроатланската перспектива на сите нас“, вели пратеникот Кастриот Реџепи преку видео порака. 

Тој додава дека претседателот Биљал Касами и останатите во Беса немаат потреба да бидат загрижени. „Јас , сум добро и на сигурно, јас сум со Албанците и со сите граѓани на државата кои сакаат мир, слобода и просперитет во земјата и продолжување на НАТО и ЕУ курсот. Имам извесни закани од некои лица, но откако тоа ќе биде минато ќе се појавам пред медиумите. Да се ангажираме сите за добро на државата, народот и демократијата, на сите, Албанци, Македонци и сите други кои живеат во Северна Македонија. Се гледаме наскоро. Ви благодарам“, порача Реџепи. 

Кој му вршел притисок? 

Тој се појави во јавноста, откако неговите сопартијци изразија сомневање дека е киднапиран и држен против негова волја. Тие најавија дека случајот го пријавиле и во полиција и дека се трага по Реџепи, кој предизвика пресврт на настаните на денешната собраниска седница, на чиј што дневен ред е иницијативата за гласање доверба на Владата. Реџепи којшто не се појави на денешното гласање предизвика иницијативата да виси во воздух, бидејќи опозицијата не успеа да обезбеди кворум.  

Претходно и координаторот на СДСМ, Јован Митрески изјави дека Реџепи не е  киднапиран, но дека има  информации дека опозицијата му вршела притисок. Тој очекува  Реџепи деновиве да излезе и да соопшти што му се случувало во овој период. 

Тој порача дека единствен виновник за она што се случува во Собранието е Христијан Мицкоски и го повика да се извини на јавноста.  „Сето она што се случи е резултат на тоа што Христијан Мицкоски јавно кажа дека има 61 пратеник, да не бара алиби, затоа што седна со тие што се анти-НАТО, анти-европски, партии кои се против концептот Едно општество за сите. Народот е излажан од Христијан Мицкоски, тој ги пумпаше невистините дека има мнозинство. Нема ново мнозинство во Собранието, рече Митрески. СДСМ најави дека парламентарното мнозинство ќе расне.