„Констатирани се знаци на почеток на офанзива во источната оперативна зона“, соопшти вечерва Генералштабот на украинската армија во Киев.

Притоа во прв ред станува збор за областите околу Харков и Доњецк. Од Исјум од областа Харков се очекува напад на руската војска во правец кон Барвинкове и Словјанск во Доњецката област.

И гувернерот на регионот Луганск, Сергиј Хајдај известува за  руски напади.  „Тукушто ја загубивме контролата врз градот Кремина, се водат улични борби“, изјави гувернерот, според кого веќе нема можност за евакуација на жителите на малиот град: „Секој час ситуацијата се влошува.". Во Кремина пред војната живвеле околу 18000 жители, од почетокот на руската агресија таму се останати уште околу 4000 мештани.

За тешки борби се јавува и од градовите Рубишне и Попасна.

Советникот на украинскиот претседател, Олехсиј Арестович уште претходно информираше за напади на  руските сили  во правец на Хуљајполе во областа Запорожје, во југоисточниот дел од земјата. Таму наводно биле ангажирани околу 10000 руски војници.

Инвазијата на Русија врз  Украина трае повеќе од седум недели, а руската војска најави дека сега ќе се концентрира врз освојување на источниот дел од соседната држава.