Стотици луѓе протестираа во холандскиот град против дополнителното заострување на мерките против ширењето на коронавирусот. По тешките безредија полицијата испука истрели на предупредување.
Насилните демонстранти во Ротердам запалија и повеќе електронски тротинети во градотФотографија: Killian Lindenburg/ANP/dpa/picture alliance
Реклама
Холандската полиција рани најмалку две лица во безредијата кои избувнаа во Ротердам поради новите епидемиолошки мерки. Демонстрантите најнапред фрлаа на полицијата со камења и со пиротехника, а запалија и полициски возила, по што полицајците испукаа предупредувачки истрели од огнено оружје.
Стотици демонстранти се собраа поради воведувањето на ковид-потврдите и забраната за огномет за време на новогодишната ноќ. Холандија во минатата недела поради растот на бројката новозаразени воведе делумен локдаун, кој ќе биде во сила 3 недели.
Вонредна состојба
Седум лица се повредени, а најмалку 20 демонстранти се уапсени во ноќта која градоначалникот на Ротердам ја нарече „оргија на насилство“. „Испукавме истрели за предупредување, а имаше и директни бидејќи ситуацијата беше опасна по живот“, изјави за агенцијата Ројтерс гласноговорничката на полицијата, Патриција Веселс. „Знаеме дека барем две лица се ранети, веројатно како резултат на истрелите за предупредување, но мораме натаму да ја истражиме причината“, додаде таа.
Подоцна беше соопштено дека меѓу повредените има и полициски службеници.
Во градот е прогласена вонредна состојба. Полицијата издаде итна уредба во Ротердам, го запре јавниот превоз и им нареди на луѓето да останат дома. Користени се водени топови, а полицијата на коњи ја растеруваше толпата луѓе.
На снимките објавени на социјалните мрежи се гледаат изгорени полициски автомобили и демонстранти кои со камења фрлаат на полицијата. Полицијата ги растера демонстрантите со водени топови.
Властите, исто така, ги повикаа минувачите и луѓето кои ги снимаа немирите снимките да ги испратат во полиција поради натамошна истрага.
Стотици луѓе излегоа на улиците на Ротердам за да протестираат против новите рестрикцииФотографија: KILLIAN LINDENBURG/ANP/AFP
Ковид-потврди само за вакцинираните и за прележаните
Поради новите мерки рестораните и продавниците во Холандија мораат да затворат порано, а забранета е публика на спортските случувања.
Воведени се и ковид-потврди кои можат да ги добијат само вакцинираните или оние кои го прележале вирусот. Тестови не се признаваат.
Вчера владата, втора година по ред, забрани огномет на 31 декември за да спречи дополнително оптоварување на здравството.
Европа: Некаде се укинуваат, а некаде се враќаат ковид-рестрикциите
Некои европски држави одлучија да ги релаксираат мерките против коронавирусот како социјалната дистанца, а други воведуваат нови ограничувања поради растот на новозаразените.
Холандија: Вакцинален сертификат и тест наместо социјална дистанца
Социјалната дистанца веќе не е обврска во Холандија. Од вторникот, холандските власти ја укинаа рестрикцијата- но воведоа задолжителен вакцинален сертификат за влез во ресторан или на концерт. За оние кои не се вакцинирани, потребен е доказ за прележан Ковид-19 или негативен тест направен во последните 24 часа.
Фотографија: Koen Van Weel/ANP/AFP/Getty Images
Данска: Ковид веќе не е „општествено критична“ болест
Со висока стапка на вакцинирани, Данска стана првата земја во ЕУ која се врати на социјален живот без ковид-ограничувања. Од минатиот петок Данците можат да влегуваат секаде со доказ дека се вакцинирани. Данската влада соопшти дека повеќе не го смета Ковид-19 за „општествено критична“ болест. Над 80% од возрасните и тинејџерите имаат добиено две вакцини.
Шведска, земјата која никогаш не ги воведе најострите ограничувања за време на пандемијата, одлучи да ги отстрани сите рестрикции за неколку недели. Над 70% од Швеѓаните над 16 години се целосно вакцинирани. Земјата има релативно ниска стапка на смртност и покрај растечкиот број на новозаразени со позаразниот Делта-сој на вирусот.
Фотографија: Anders Wiklund/TT NEWS AGENCY/AFP/Getty Images
Германија: Акција за вакцинација
Со целосно вакцинирани околу 62% од населението, Германија сега заостанува зад дел од своите соседи. Затоа владата ја започна кампањата „Акциска недела за вакцинација против ковид“. Во јавните простори се поставуваат мобилни вакцинални центри за да се олесни пристапот на граѓаните до вакцината.
Фотографија: Michele Tantussi/REUTERS
Франција: Протести против обврската за вакцинација
Соочена со голем отпор кон вакцинирањето, Франција на почетокот на август наложи задолжителен вакцинален-пасош за влез во јавни простори- што предизвика бран протести. Минатата сабота, околу 12 илјади луѓе маршираа на улиците на Париз против сертификатот. Некои синдикати и граѓански организации ги поддржаа протестите, загрижени поради нарушувањето на индивидуалните права.
Фотографија: Benoit Tessier/REUTERS
Австрија: Заострени рестрикции
Соочени со раст на бројот на новозаразените и на хоспитализациите, австриските власти ги заоструваат рестрикциите кои претходно беа релаксирани. Според новата регулатива која влезе во сила во средата, антигенските тестови ќе важат само 24 часа низ цела Австрија. Некои патни ограничувања, особено за патници од САД, се повторно вратени.
Фотографија: Thomas Kronsteiner/Getty Images
Бугарија: Нови рестрикции по растот на бројките
Во Бугарија, која со 20% целосно вакцинирани е на европското дно, пандемијата е далеку од завршена. Државата сега се соочува со нов, брз раст на бројот на инфекциите поради делта варијантата. Поради тоа властите воведоа полициски час ноќе, повторно ги затворија ноќните клубови, и ги намалија капацитетите на кината, рестораните, па дури и настаните на отворено.
