Колку вреди „Made in Germany“ во светот?
22 јануари 2014![](https://static.dw.com/image/17179424_800.webp)
Ознаката за потекло „Made in Germany“ мора да остане во употреба, се пораките кои политичарите и претседателите на разни здруженија од Германија ги испраќаат во Брисел. Имено, во ЕУ се размислува ознаката за потеклото да се прилагоди на царинските прописи. Критичарите сметаат дека тоа е опасност за добрата позиција која во светот ја имаат германските производи. На ознаката „Made in Germany“ не и‘ веруваат само потрошувачите во Германија, туку и ширум светот.
Државната Агенција за трговија и инвестиции (ГТАИ) сака точно да знае колку вреди оваа ознака. Оваа агенција, меѓудругото, ги информира германските фирми за пазарите во странство и ги следи странските инвеститори при отворањето на нивните канцеларии или погони во Германија. Оттаму велат дека германските производи биле ценети во Русија уште во времето на царството. Бернд Хонес од Агенцијата вели дека една германска машина е доволна за руските претприемачи да им гарантираат квалитет на своите муштерии. „На интернет, потрошувачите имаат само пофалби. Во Русија, под ознаката „Made in Germany“ се подразбира квалитет и сигурност“, вели Хонес.
Добра репутација, лоша врска со купувачите
Слични вести доаѓаат и од Велика Британија. „Репутацијата на производите и услугите од Германија е непроменета. Таа е добра“, вели Штефен Енингер од канцеларијата на ГТАИ во Лондон. „Врската на Британците со германските производи и услуги е долга повеќе од 110 години и според испитувањата на јавното мислење, таа врска последниве години е уште посилна“, вели Енингер.
Состојбата во Јужна Америка, во Бразил е малку поинаква. Таму ознаката Made in Germany се‘ уште е гаранција за квалитет, но паѓа подотвеноста тоа да се плати, вели Оливер Доне од канцеларијата во Сао Паоло. „Германските фирми треба повеќе да инвестираат во комуникација и во сервисни услуги. Треба повеќе да им се приближат на купувачите, односно да одржуваат контакт со нив и откако ќе го купат производот“, вели Доне.
Популарната ознака е добар аргумент и во Кина, но тоа не води до успех, објаснува Штефани Шмит која раководи со канцеларијата на ГТАИ во Пекинг. „Фирмите кои произведуваат во Кина на купувачите мораат да им објаснуваат дека производите се само дизајнирани и проектирани во Германија“, вели Шмит.
На цена машините и автомобилите
Во Индија, германските производи се сметаат за квалитетни, но високите цени ги одвраќаат потрошувачите, вели Катрин Пасвантис од канцеларијата во Њу Делхи. „Германскиот дизајн и животен стил не се многу омилени, за разлика од машините“, вели таа.
Во САД, квалитетот се цени, но во истовреме е и голема, понекогаш и несакана, конкуренција за домашните производи. Слично е и во Јапонија, каде особено се почитуваат машините и автомобилите.
Ознаката „Made in Germany“ сепак не е ограничена само на производите. Тоа го покажуваат фестивалите како Октоберфест, или божикните пазарчиња од германски тип кои се одржуваат и во Јапонија.