Во повеќе експлозии во и околу градот Ал-Свеида во Сирија се убиени преку 70 луѓе. Одговорна за координираните самоубиствени напади е терористичката милиција Исламска држава.
Фотографија: picture-alliance/AP Photo/SANA
Реклама
Сириската државна новинска агенција Сана јавува дека борците на терористичката милиција Исламска држава се обиделе да го нападнат градот Ал-Свеида. Еден атентатор-самоубиец се разнесол во воздух на пазар, а на безбедносните сили им успеало да убијат уште двајца други мажи пред да можат да го активираат експлозивот на себе.
Сириската опсерваторија за човекови права соопшти дека вкупно четворица напаѓачи требало да ги активираат експлозивните појаси. Еден жител на Ал-Свеида сведочи за избивање паника во градот, други пак јавуваат за експлозии кои ја потресле целата област.
Сириската опсерваторија за човекови права со седиште во Лондон тврди дека истовремено со координираните напади во Ал Свеида, Исламска држава ставила под своја контрола повеќе села во околината. Портпаролот на Опсерваторијата, Рами Абдел Рахман изјави дека во нападите загинале вкупно 32 војници на страната на сириската влада, 22 цивили и 21 припадник на ИД. Организацијата со седиште во Лондон располага со раширена мрежа информанти во од граѓанската војна потресуваната Сирија, но нејзините наводи не можат да се потврдат од независни извори. Сириските државни медиуми јавуваат за загинати и ранети во Ал-Свеида и околните села, но без да наведуваат бројки.
Сириската армија и нејзините сојузници, првенствено Русија, во минатите недели во голем дел ја презедоа контролата врз јужниот дел од земјата, каде сѐуште водат борби со огранок на ИД, кој ја контролира областа кон границата со Голанската Висорамнина, окупирана од Израел. ИД целосно ја загуби контролата на големи делови од сириската територија, кои претходно беа во нејзини раце, но уште е активна во одделни места. Според Сана, нападите на ИД врз Ал-Свеида се обид за намалување на притисокот врз последните преостанати борци на ИД во зафрлените делови западно од Дара, на кои неминовно им се заканува пораз.
Што всушност претставува „Исламска држава“?
„Исламска држава“, покрај разорувањата во Ирак и Сирија, во вестите често се наоѓа и поради нејзината бруталност. Што е ИД и колку е моќна? Во продолжение ви претставуваме одговори на најчесто поставуваните прашања.
Што е „Исламска држава“?
Се смета дека „Исламска држава“ е фракција од терористичката организација Ал Каеда, т.е. сунитска милитантна група, за која се верува дека е формирана како одговор на недовербата и фрустрациите од неуспешното владеење на владите во Сирија и Ирак. На нивното знаме пишува „Мухамед е пророкот на Бог“ и „Нема друг бог освен Алах“ - фрази со кои се согласуваат сите муслимани, не само „ИД“.
Фотографија: AP
Каде е активна „Исламска држава“
Целта на „Исламска држава“ е формирање на „калифат“ - држава каде се почитуваат традиционалните вредности на исламот и шеријатското право. Поради нестабилноста на регионите во Сирија и Ирак, „Исламска држава“ успеа да освои и да стави под своја контрола тероитории во двете држави.
Што ја прави „Исламска држава“ различна?
Клучна разлика е бруталноста на „Исламска држава“ со која се влева страв кај противниците и цивилите - преку егзекуцијата со обезглавување и бруталното насилство. Лидерите на „ИД“ велат дека владеат со регионите кои ги освојуваат. Експертот за Средниот Исток, Шади Хамид за ПБС изјави: „Тие нудат социјални услуги. Управуваат со локалната власт. Обезбедуваат минимално ниво на право и поредок“.
Фотографија: gebphotography - Fotolia.com
„ИД“ во однос на останатите терористички организации?
„ИД“ е активна во Сирија и Ирак, но нигериската терористичка организација Боко Харам неодамна ја изрази својата поддршка. Тоа е како натпревар во суровост: додека Боко Харам е одговорна за 13.000 смртни случаи, „ИД“ е одговорна за најмалку 24.000 повредени или убиени. Ал Каеда се дистанцираше од „ИД“, а една од нејзините фракции наречена Нусра Фронт се бори против „ИД“.
Фотографија: Getty Images/A. Katib
Кои се следбениците на „Исламска држава“?
Нешто по кое се разликува „ИД“ се нејзините следбеници. Повеќе од 20.000 странски борци се придружија на групата, од кои повеќе од 4.000 доаѓаат од западна Европа и северна Америка. На сликата се прикажани државите од каде што потекнувааат најголемиот дел на борците. Најголем број борци - споредено со вкупниот број на жители на земјите, доаѓаат од мали земји како Шведска и Белгија.
Што преземаат западните влади против „Исламска држава“?
Од август 2014 година, коалиција предводена од САД спроведува воздушни напади против цели на „ИД“ во Сирија (1.422 напади) и Ирак (2.242 напади). Некои влади исто така беа активни во рамките на нивните држави: Германија ќе процесуира најмалку 30 осомничени милитанти кои се вратиле од Сирија, додека Саудиска Арабија уапси 93 осомничени милитанти во април 2015 година.
