Коронавирус во Вухан: „На почеток чувствував огромен страв“
Штефен Вурцел/АРД
24 декември 2020
Многумина жители на Вухан насетувале дека нешто не е во ред, но властите биле завиени во молк. 26-годишниот Шен Жилонг за коронавирусот дознал од свој пријател – лекар. А потоа работите се промениле од корен.
Фотографија: Steffen Wurzel/SWR
Реклама
Пред една година, пред преминот од 2019 во 2020 година, во централнокинеската метропола Вухан беа соопштени првите случаи на Ковид-19. Одделни случаи на инфекција имало веќе со недели порано, но кинеските власти првично се обидувале од јавноста да ги сокријат ризиците и опасностите кои произлегуваат од вирусот.
26-годишниот Шен Жилонг од Вухан не само што добро, вклучувајќи и здравствено, го поминал локдаунот на почетокот на 2020 година, туку сега дури се чувствува и посилен од претходно, од кризата излегол зајакнат.
„Кога сето почна, чувствував огромен страв. Но, кога потоа донесов одлука дека мора да се помине низ кризата, повторно можев да размислувам со бистра глава. По два-три дена стравот го снема, наеднаш се почувствував силен. Тој смртен страв одеднаш исчезна."
Шен Жилонг е заменик шеф на еден луксузен ресторан во туристичкиот центар на Вухан. Гордо ја презентира двокатната зграда. На катот се наоѓаат неколку елегантно уредени сепариња со големи тркалезни маси и кичести кристални лустери на таванот.
Кога човек ќе ги тргне тешките завеси од пред прозорците, се отвора поглед кон прочуеното шеталиште и кварт за забава во Вухан – Тианди.
Од Азија кон Европа: Походот на заштитните маски против коронавирус
Прво важеа за неефикасни и збунувачки, но се‘ повеќе земји во меѓувреме воведуваат правило за носење заштитни маски против ширењето на коронавирусот. За победоносниот поход на маските, започнат во Азија.
Фотографија: picture-alliance/dpa/U. Zucchi
Ракавици, мобилен телефон, заштитна маска
Дали и во Германија ќе се воведе обврска за носење заштитна маска? По консеквентната употреба во Азија, институтот Роберт Кох препорача нејзино носење и во Германија. Јена е првиот град кој ја водведе оваа мерка, од 6 април во супермаркетите и јавниот сообраќај таму таа е задолжителна. Како заштита се прифаќа и шал или марамче на устата.
Фотографија: Imago Images/Sven Simon/F. Hoermann
Подарок за пожарникарите
Со оглед на големиот недостиг на заштитни маски, луѓето и институциите се снаоѓаат и сами. На Јутјуб и на Твитер под хаштагот „maskeauf“ многумина демонстрираат колку е едноставно да се изработи маска. Меѓу нив е и професионалната шивачка од Државниот театар Котбус, Керстин Бохов. Маските кои ги изработува оваа костимографка се наменети за пожарникарската служба и за Црвениот крст во Германија.
Фотографија: picture-alliance/dpa/P. Pleul
Плетени маски
Уметничката Манша Фридрих плете маски за заштита од коронавирус. Нејзините маски се украсени со мотиви на насмеани лица, животни, сонце. Внатрешната страна на маските може да се менува. Уметничката од Хановер не дозволува корона-кризата да ѝ го расипе расположението.
Чешка и Словачка се отидени чекор понапред, таму уште на средината на март е воведена обврска за носење заштитни маски. Оној кој влегува во супермаркет или градски превоз, мора да носи маска. Словачката претседателка Зузана Чапутова и премиерот Игор Матович предничат со добар пример. И Австрија во меѓувреме воведе обврска за носење маски во супермаркет.
Фотографија: Reuters/M. Svitok
Будење на пролетта во Кина
Во Кина заштитните маски одамна се задолжителни за граѓаните. Оваа двојка, без оглед на кризата со коронавирус и ригидните контроли, не сака да се откаже од романтика. Двајцата занесено танцуваат на пролетното сонце и сигурно забораваат на сите останати околу себе.
Фотографија: AFP
Израел не дозволува исклучоци
И во Израел во сила се драстични ограничувања на движењето, кои ги воведе премиерот Бенјамин Нетанјаху, а се контролирани од полицијата и од војската. Кон нив мора да се придржуваат и ортодоксните Евреи. Во квартот Меа Шерим во Ерусалим, еден вооружен полицаец му наложува на својот ултраортодоксен сограѓанин да се прибере дома.
Фотографија: picture-lliance/dpa/I. Yefimovich
Уметност во Појасот Газа
Во густо населениот Појас Газа, уметниците се обидуваат да ги мотивираат граѓаните. Во квартот Шујаија, тие украсуваат заштитни маски со различни мотиви. Владата во Појасот Газа воведе ограничување за движењето на населението и забрана за одржување на сите манифестации. И т.н. „Марш на враќањето“, кој секоја година преку масовни протести се одржува на границата кон Израел, годинава е откажан.
Фотографија: Imago Images/ZUMA Wire/A. Hasaballah
Колумбиски „силници“
Во Колумбија на маските доминираат драстични и впечатливи мотиви. Вилиците на маските на двајцата полицајци се чини се инспирирани од колосот Хулк. Хулк е главната фигура во стрипот на Стен Ли и Џек Кирби, објавен во 1962 година. Приказната за неверојатниот Хулк е адаптирана во бројни филмови и серии.
Фотографија: AFP/L. Robayo
Макрон ќе се справува со недостигот од маски
Францускиот претседател посети фабрика за производство на заштитна облека и маски во Сент-Бартоломи д‘Анжу. Стотици лекари ја критикуваат владата што не набави доволни количини заштитна облека во време на епидемијата на коронавирус, но многумина од нив сепак работат, дури и без заштита. Емануел Макрон планира потребата од заштитна опрема да ја покрие со домашно производство до крајот на годинава.
Фотографија: Getty Images/AFP/L. Venance
9 фотографии1 | 9
Шен седнува на една од масите и раскажува како на средината на јануари првпат чул за тогаш уште безимениот, мистериозен нов вирус.
„Еден од моите пријатели е лекар. Тој работи во одделение за болести на дишните патишта на една болница овде во Вухан. Всушност, бевме договорени да се најдеме за заедничка вечера. Во тоа време никој преку вестите немаше дознаено ништо за вирусот. Но, ние насетувавме дека нешто се случува. Мојот пријател лекар во тоа време не се осудуваше да ни каже нешто поконкретно, но таа вечер не се појави на договорениот состанок. Наместо тоа, ни испрати СМС порака: ‘Купете си маски!' Се разбира, ние се прашувавме – што се случува?!"
Во неделите пред целосната изолација на Вухан на 23 јануари, државните органи со денови се обидувале да ја минимизираат опасноста од тогаш непознатиот нов коронавирус. До кратко пред локдаунот, власта се обидувала целосно да ги минимизира размерите на болеста, која курсирала уште од декември.
Оние кои уште на крајот на декември предупредуваа на опасноста од новиот вирус, како лекарот Ли Венлианг, биле подложени на закани од страна на полицијата и принудно замолчувани.
Кафулиња во квартот Тианди во Вухан - животот сега повторно е вратен во нормалаФотографија: Steffen Wurzel/SWR
Заменикот шеф на ресторан Жилонг тогаш првенствено бил загрижен за здравјето на својата фамилија, но и за полните фрижидери и складишта на ресторанот. На големи количини скапи прехранбени производи во вредост преу десет илјади евра им се заканувало расипување.
„Се собравме заедно сите и ги замоливме вработените да останат доброволно и да продолжат со работа. Решивме да продолжиме со готвење и јадењето да го лиферуваме во болниците во Вухан. Преку нашите социјални мрежи воспоставивме контакти со болниците каде се третираа итни случаи. Во тоа време за медицинскиот персонал таму често немаше доволно храна. Немаа дури ни леб или готови супи."
Пожртвуваната акција на безбројни граѓани како Шен Жилонг, која овозможила градот натамошно да функционира, за кинески услови е невообичаен ангажман на цивилното општество. За сите тие недели тој не добил пари од државата, вели гастрономот, но:
„За време на локдаунот фирмата која ни ги издава просториите за ресторанот ни ја одложи киријата. На нашите вработени им ги скративме платите на половина, тие тоа го прифатија. Значи, нашите фиксни трошоци беа прилично ниски. Така ги преживеавме месеците на карантин", раскажува Шен.
