Коронавирус и во Кавадарци, бројката достигна 76 лица
БГ
21 март 2020
Со шест нови заразени од Ковид-19 регистрирани вечерва, вкупниот број на пациенти во Северна Македонија се искачи на 76 лица. Вирусот евидентиран и кај две лица во Кавадарци.
Фотографија: Regierung Nordmazedonien
Реклама
Кавадарци од вечерва е нова точка на мапата на која се регистрирани заразени од новиот коронавирус Ковид-19 во Северна Македонија, а вкупниот број се искачи на 76 лица. Вечерва се дијагностицирани шест нови пациенти позитивни на коронавирус. Два случаи се сопружници од Кавадарци, а од тој град се тестира и уште едно лице. Заразата досега е регистрирана и во Скопје, Дебар, Гостивар, Охрид и Штип.
Министерот за здравство Венко Филипче попладнево информираше дека како резултат на порастот на бројот на заболени ќе се обединат капацитетите на државната лаборатија во Институтот за јавно здравје и лабораторијата на Клиниката „Жан Митрев“, а контрола ќе може да се врши и во скопските поликлиники Чаир и Јане Сандански.
Упатства: Како да се заштитите од коронавирус
Луѓето ширум светот ставаат заштитни маски за дишење за да спречат вирусна инфекција. Сепак, други мерки се поефикасни. Еве неколку совети засновани на упатствата на СЗО.
Фотографија: Getty Images/X. Chu
Подобро од ништо
Не е докажано дека маските за лице можат ефикасно да ве заштитат од вирусни инфекции. Овие маски веројатно се во можност да фатат некои микроби пред да стигнат до устата или носот. Но уште поважно е тоа дека тие ги спречуваат луѓето да ги допираат устата или носот (што повеќето луѓе го прават инстинктивно). Ако веќе сте болни, таквите маски може да спречат да не заразувате други.
Фотографија: Getty Images/Stringer
Дезинфицирајте ги рацете
Во својот список на препораки како да се заштитите од зарази, Светската здравствена организација не споменува маски за лице. На врвот е често миењето на рацете. СЗО препорачува дезинфекциско средство за рацете на база на алкохол, како на фотографијата, кои најчесто ги гледаме во болниците
Фотографија: picture-alliance/dpa/S. Pilick
И сапун и вода ќе завршат работа
Поедноставното секојдневно решение се водата и сапунот, ако ги имате при рака. Но, проверете дали темелно ги миете рацете...
Фотографија: picture alliance/dpa/C. Klose
Кашлање и кивање - но направете го тоа правилно!
Еве што препорачуваат лекарите: Кога кашлате и кивате, покријте ја устата и носот со вашиот подигнат лакот. Или користете книжни марамчиња - но потоа веднаш фрлете го марамчето и измијте ги рацете. А кошулата или џемперот? Не, нив не мора да ги фрлите. Но, перете ги често или однесете ги на хемиско чистење.
Фотографија: Fotolia/Brenda Carson
Стојте подалеку!
Друга препорака која можеби не функционира за сите: Избегнувајте близок контакт со секој кој има треска и кашлица! Ако треба да имате контакт со болни луѓе, погрижете се да преземете дополнителни заштитни мерки.
Фотографија: picture alliance/empics
Имате треска? Одете на лекар, а не на патување!
Ако имате треска, кашлица и отежнато дишење, побарајте лекарска помош навреме. Избегнувајте јавни места за да не ги инфицирате другите. И, исто така, објаснете му на вашиот лекар каде претходно сте патувале.
Фотографија: Reuters/P. Mikheyev
Избегнувајте контакт!
При посета на сточни и зелени пазари во области во кои во моментот има случаи на новиот коронавирус, избегнувајте директен незаштитен контакт со живи животни. Тоа исто така вклучува какви било површини кои се во контакт со животни.
Фотографија: DW
Добро термички обработено - не сурово!
Варете,печете и пржете го месото темелно. Потребно е да се избегне конзумирање на сурови, недоволно термички обработени производи од животинско потекло. Со суровото месо, млекото или животинските органи треба да се постапува внимателно за да се избегне инфицирање од термички необработена храна. Овие се добри практики за безбедност на храната и помагаат да се спречи ширењето на болести.
Фотографија: picture-alliance/Ch. Mohr
8 фотографии1 | 8
Во земјата досега не се регистрирани автохтони случаи на болеста, односно сите пациенти се заразиле од претходно откриени случаи. Таков е и последниот пример на една пациентка која патувала во Србија, како и новиот пациент од Штип кој е роднина на четиригодишното заразено девојче кое се вратило од Англија.
Министерот за внатрешни работи Наќе Чулев денеска информираше дека еден вработен во МВР исто така има коронавирус.
Сите, освен една пациентка, се во добра состојба. Пациентката која од претходно беше ставена на механичка вентилација во меѓувреме е во критична состојба. Голем дел од пациентите се на домашно лекување, а капацитетот на Инфективната клиника досега е искористен со 20 проценти, информира Филипче.
Вкупно во земјата досега се направени 888 тестови (без последните тестирани вечерва), на располагање се уште 1.400 тестови, а се очекува да пристигнат уште две илјади.
Од сабота (21.03.), во патролирањето во урбаните средини и во обезбедувањето на границата ќе помага и Армијата.
