Со години имено, на сметка на Фолксваген заминувале на скапи туристички патувања. Освен тоа, се зборува и за големи сметки за ручеци и други задоволства на разни забави на сметка и на штета на фирмата. В петок треба да биде соопштен извештајот од истрагата.

Измами, проневери, секси забави на сметка на фирмата. Сето заедно – материјал за многу крими филмови. Она што се случувало во Фолксваген и наликува на крими, всушност е чиста реалност. Членови на менаџерскиот тим, се тврди во обвинувањата, склучувале зделки на штета на фирмата, со милиониски загуби за концернот. Освен тоа и скапи патувања во странство. Сета афера се појави летоска, кога беше откриена цела мрежа валканици: Хелмут Шустер, отпуштениот шеф на Шкода, наводно префрлал пари на своето конто. Тој е обвинет дека од владата на една индиска сојузна држава касирал два милиона евра за ветувањето дека Фолксваген таму ќе гради сопствена фабрика. Веднаш потоа се појави ново име: Клаус-Јоаким Гебауер, некогашен член на менаџерскиот тим. И тој бил замешан во валкани зделки. Освен тоа, организирал различни секс-забави што за некои членови на управниот совет подоцна ќе станат катастрофални. Гебауер за обвинувањата вели:

„Некои од нештата што се спомнуваат делумно се вистински. Единственото за што се каам е дека дојдов во ситуација во која не сакав, поради други...„.

И долгогодишниот влијателен шеф на фирмата Клаус Фолкерт се најде во калта на аферата. Јавниот обвинител води истрага против него поради сомневање за помош или учество во проневера:

„Накусо: јас не сум свесен за никаква вина, воопшто не знам со што ја заслужив честа да ме гонат сите весници„.

Врвот на Фолксфаген сака расчистување на сите дејанија без остаток, а тоа го бара и премиерот на Долна Саксонија, Кристијан Вулф. Неговата покраина е најголемиот акционер во Фолскваген:

„Оние што на каков и да е начин се виновни ќе ги ослободат своите места и ќе ја преземат одговорноста, а потоа ние ќе преземеме мерки такво нешто повеќе да не се повтори„.