Во првите реакции доцна синоќа, косовската влада го отфрли нацртот на спогодбата како неприфатлив. Косовската влада синоќа истакна дека нацрт-спогодбата, сочинета во три точки, е неизводлива на територијата на Косово, па затоа владата ќе продолжи да ги почитува реципрочните мерки во трговската размена со Србија.

Рамковниот договор за решавање на кризата на северот на Косово синоќа го постигнаа командантот Билер и претставниците на владата на Србија министерот Горан Богдановиќ и дипломатот Борко Стефановиќ. Според договорот, меѓународните сили до средината на септември, а доколку е потребно и подолго, ќе ја задржат контролата над спорните гранични премини Брњак и Јариње. Договорот предвидува барикадите на патиштата, кои водат кон овие премини поставени од косовските Срби, да бидат отстранети и повторно да биде воведена слобода на движење.

Договорот може да стапи на сила за неколку дена

Во соопштението на Главната команда на КФОР во Приштина беше наведено дека моменталниот систем на контрола на премините Јариње и Брњак треба да остане ист до средината на септември, а ако биде потребно тоа да се продолжи. КФОР ја има командата на премините и ги контролира процедурите.

Договорот може да биде применет во текот на наредните денови соопшти Главната команда на меѓународните мировни сили на Косово, според која командантот Билер имал целосно овластување на сите одговорни институции за разговори со претставниците на Србија.

Денеска амбасадорите на земјите-членки на ЕУ кои се задолжени за надворешно-политички прашања во Брисел одржуваат вонреден состанок, на кој расправаат за кризата во северниот дел на Косово.

Досега 22 земји членки на Унијата ја признаа независноста на Косово, а пет се’ уште не.

Автор: ТТ/ СН/ АT/ бета/ дв/ миа

Редактор: Александра Трајковска