Косово и Турција на чекор до визна либерализација
4 мај 2016![](https://static.dw.com/image/19070149_800.webp)
Европската комисија во Брисел соопшти дека предлогот за Косово до Советот и до Европскиот парламент е упатен заедно со поволната оценка на Комисијата дека Косово ги исполнило сите барања предвидени со „мапата“ за режим на визната либерализација.
„Ова е резултат на напорната работа и на успешните напори на косовските власти во остварување на далекусежните реформи во областа на правосудството и внатрешните работи, како и со нив поврзаните сектори на владеење на правото и реформи на правосудството“, изјави еврокомесарот за внатрешни работи и имиграција Димитрис Аврамопулос. Косовците, ако препораката биде прифатена, ќе можат со биометриски пасоши да влегуваат без визи и да престојуваат во Шенген-просторот до три месеци, но ова не се однесува на Ирска, Велика Британија, Лихтенштајн, Норвешка и Швајцарија.
Европската комисија денеска предложи безвизен режим и за граѓаните на Турција. Тоа е дел од спогодбата ЕУ-Турција за запирање на приливот нелегални мигранти преку турско-грчката граница, а со тоа и надворешната граница на Шенген. Како што изјави потпретседателот на ЕК , Франс Тимерман, Анкара оствари значаен напредок во исполнувањето на 72 услови за безвизен режим, но остануваат незавршени уште пет услови, а тоа се сузбивање на корупцијата, спогодба за соработка на Турција со Европол, согласност на Анкара за соработка со правосудството во сите држави на ЕУ, мерки за заштита на податоците во согласност со стандардите на Унијата, како и преиспитување на турските закони за тероризам. Турските власти за своите граѓани треба да обезбедат биометриски пасоши. Официјална Анкара искажа решеност да ги исполни во целост овие услови.