Инспекторите во „лов“ на загадувачите на Охридското Езеро
ДТЗ
27 јули 2021
Директорката на инспекторатот, Ана Петровска,утре доаѓа на терен да ги согледа сите „жаришта“ којшто се детектирани на крајбрежјето, а мора итно да се санираат.
Фотографија: picture alliance / Zoonar
Реклама
Инспекторите излегуваат на терен во „лов“ на загадувачите на Охридското Езеро. По постојаните аларми на еколошките здруженија и граѓаните дека немилосрдно се фрла отпад, шут и фекалии во езерото, во екот на туристичката сезона, комунални инспектори ќе вршат увид во Охрид. Во фокусот на јавноста е особено потегот кај Свети Наум, по објавите на социјалните мрежи на кои се тврдеше дека фекалии се испуштаат од цистерна веднаш до црковниот комплекс. Ваквите информации се појавија речиси истовремено кога беше соопштена одлуката на Комитетот за светско наследство на УНЕСКО, која му даде уште една шанса на Охрид во наредните две години да ги санира сите неправилости во управувањето со регионот.
Пелени и облека ја запушиле канализацијата
Пелени и парчиња облека фрлени во тоалетите во комплексот Свети Наум деновиве предизвикаа запушување на канализациската мрежа. Во обид да се санира проблемот била повикана цистерна за да ја отпуши канализацијата и да се овозможи проток на отпадните води кон пречистителната станица, велат од Државнот инспекторат за животна средина за ДВ.
Дел од фекалиите, сепак, завршиле во околните грмушки - и токму тој момент бил регистриран од граѓаните, коишто споделија фотографии и видео на социјалните мрежи, алармирајќи дека се загадува најчистата вода од охридскиот воден систем. „На местото каде што е изворите кај Св. Наум, кои се жариште на биолошката разновидност, строго заштитена зона, се случува најгрозоморното загадување на водата која важи за света“, реагираа од еколошките здруженија.
УНЕСКО: Загрозено светско наследство
Комитетот за светско наследство постојано преиспитува дали она што се наоѓа на листата на Светско наследство сѐ уште ја заслужува таа титула. Годинава на црвената листа се најдоа познати места, меѓу нив и Охрид.
Фотографија: Eberhard Thonfeld/imago images
Охридско Езеро: Туризам или Светско наследство?
Охридското Езеро е најстарото езеро во Европа и едно од најстарите езера во светот. Научниците пресметале дека е старо над 1,36 милиони години. Во 1979 година Унеско го стави на листата на Светско наследство. Поради туристички проекти и недоволна грижа за природното богатство, сега се исполнети условите Охридскиот регион да се впише на Листата на Светско природно и културно наследство во опасност.
Фотографија: picture alliance / Zoonar
Венеција: Премногу туристи, преголеми бродови
Пред две години градоначалникот на Венеција го повика УНЕСКО да го стави неговиот град на Црвената листа на загрозено светско наследство. Тоа беше повик за помош поради огромните маси туристи во градот. Сега оваа „желба“ би можела и да се оствари: На седницата во Фужоу, Кина (од 16 до 30 јули) Светскиот комитет ќе одлучува за тоа дали Венеција навистина ќе биде деградирана.
Фотографија: Eberhard Thonfeld/imago images
Стоунхенџ: Историски камења наспроти автопат
Формацијата од камења Стоунхенџ, во јужна Англија, која е стара повеќе од 4000 години, од 1986 година е дел од Светското наследство. Секоја година таа привлекува речиси еден милион туристи. Поради еден проект за автопат кој води покрај Стоунхенџ и ги поврзува градовите Бервик и Ејмсбери, Стоунхенџ би можел да се најде на Црвената листа на УНЕСКО.
Фотографија: Dae Sasitorn/imago images
Спомен обележје Аушвиц-Биркенау
Од 1979 година дел од Светското наследство е и Спомен обележјето Аушвиц-Биркенау. Тоа потсетува на концентрациониот логор на нацистите во кој биле убиени повеќе од 1,1 милион луѓе. Комитетот за светско наследство критикува дека големи сообраќајни проекти би можеле да влијаат негативно врз карактерот на спомен обележјето и се жали на недоволната кооперативност на локалните власти.
Фотографија: imago images/robertharding
Камчатка: Експлоатација на природни богатства
По 25 години на листата на Светското наследство, вулканскиот регион на полуостровот Камчатка, на истокот на Русија, е соочен со преместување на Црвената листа на УНЕСКО. Дел од многуте причини за тоа: илегален риболов, незаконска експлоатација на земни богатства, како злато и гас, намалување на бројот на диви животни поради уништување на нивниот животен простор, како и политичко лошо менаџирање.
Фотографија: Alexei Maishev/Tass/imago images
Кенија: Старото градско јадро на Ламу Таун
Најстариот постојано населен град во Кенија постои околу 750 години, а прекрасното старо градско јадро е на листата на Светско наследство од пред 20 години. Но, сега е соочен со префрлање на Црвената листа, поради тоа што неговиот карактер е многу загрозен од начинот на којшто се гради, како и поради проблемот со отпадот и планираните големи проекти како нафтовод и меѓународен аеродром.
Фотографија: Sergi Reboredo/picture alliance
Австралија: Големиот корален гребен
Големиот корален гребен стана дел од Светското наследство во 1981 година. Тој се состои од речиси 3000 поединечни корални гребени и се протега во должина од околу 2300 км. Но, поради промените на климата и растечките температури на водата, тој ги загуби речиси половината од своите корали. Бури, дупчење гас и хаварисани бродови претставуваат исто така закана за неговиот статус на Светско наследство
Фотографија: Kyodo/MAXPPP/picture alliance
Бангладеш: Мангровите шуми Сундарбан
Најголемите мангрови шуми на Земјата имаат површина од над 10.000 квадратни километри, од кои две третини припаѓаат на Бангладеш, а една третина на Индија. Мангровите шуми се дом на многу загрозени видови и се дел од Светското наследство од 1997 година. Поради нелегален лов, загадување на водата, незаконска сеча на шумите и зголеменото ниво на морето, шумите се соочени со ставање на Црвената листа
Фотографија: NASA/ZUMA Wire/picture alliance
Танзанија: Резерватот Селус
Само што доби статус на Светско наследство во 1982 година, а УНЕСКО веќе се жалеше на „илегални активности“ во најголемиот резерват за диви животни во Африка. Селус се најде на Црвената листа во 2014 година поради повеќе работи: премногу туристи, експлоатација на земни богатства, проект за брана и големо намалување на популацијата поради незаконски лов на диви животни.
Фотографија: Greg Armfield/AP/picture alliance
Ливерпул: Пристаништето пред исклучување
Со конечно исклучување од листата на Светско наследство е соочен и квартот околу пристаништето во Ливерпул. Тој се најде на Црвената листа само осум години по добивањето на титулата (2004), поради тоа што објектите не се одржуваат како што треба, а градежни објекти во околината негативно влијаат врз карактерот на тој дел од градот.
Фотографија: Debu55y/Panthermedia/imago images
10 фотографии1 | 10
Според Инспекторатот за животна средина, целиот комплекс е приклучен на прочистителна статица, но одвреме-навреме во екот на сезоната се случува да се запуши канализацијата, што често доведува и до прегорување на моторите на пумпите во пречистителната станица. Со цел да се спречи нов инцидент во иднина, Црквата којашто управува со комплексот, ќе има обврска да случи договор до комуналното претпријатие, коешто ќе води грижа за правилно третирање на отпадните води.
Обиколка на камповите
Охрид утре ќе го посетат и од Државниот инспекторат за животна средина. Директорката на инспекторатот, Ана Петровска, за ДВ вели дека утре доаѓа на терен да ги согледа сите „жаришта“ којшто се детектирани на охридското крајбрежје, коишто ќе мора итно да се санираат. По укажувањата на УНЕСКО, под чие будно око ќе бидат Северна Македонија и Албанија во наредните две години, Петровска вели дека имаат „мотив повеќе итно да го решат пробемот со загадувањето на Охридското Езеро“.
„Состојбата е лоша и тоа трае подолго време. Особено на потегот кај Пештани каде што нема колекторски систем и сиот отпад и фекалии, се случува директно да се испуштаат во езерото“, вели Петровска.
Таа утре планира да изврши обиколка на камповите коишто се поставени на овој дел на крајбрежјето, ќе се проверува и дали има пропус на колекторскиот систем кај Воска.
Состојбата е лоша и тоа трае подолго време. Особено на потегот кај Пештани каде што нема колекторски систем и сиот отпад и фекалии, се случува директно да се испуштаат во езерото.Фотографија: picture alliance / Zoonar
Со последната одлука на УНЕСКО, Охридското Езеро привремено ја избегна опасноста да биде ставено на Листата на светско наследство во опасност, но не ќе може да избега од исполнувањето на препораките за заштита на регионот. Во наредните две години и Северна Македонија и Албанија добија полни раце со обврски - ќе мора да донесат заеднички стратешки план за рехабилитација на регионот и дополнително да го подигнат нивото на билатералната заштита и управување со светското наследство. Двете земји добија повеќе време за да ги исполнат препораките кои произлегуваат од реактивните мониторинг мисии и одлуките на Комитетот, но и поголема одговорност да ја искористат втората шанса којашто им ја даде УНЕСКО.
Градоначалникот на Охрид, Константин Георгиески најави дека сите нелегални градби кои претставуваат опасност за регионот и се во спротивност на режимите на заштита ќе бидат отстранети и дека нема да има никаква селективност во постапките.