Експертите предупредуваат дека осигурителните полиси вообичаено не ги покриваат трошоците од епидемии. Прашањето е кој ќе ги плати, потенцијално, огромните трошоци поради корона-вирусот?
Фотографија: picture-alliance/dpa/P. Janthong
Реклама
Покривањето на загубите поради ширењето на корона-вирусот веројатно ќе падне врз хотелите, авионските компании и другите индустриски гранки, затоа што епидемиите не се вклучени во осигурителните полиси. Се работи за загуби во вредност од милијарди долари предизвикани поради откажани настани, патувања и сместување.
„Осигурителните компании ќе добијат најголем број барања од туристичките и услужните дејности, а потоа ќе следуваат здравствени и смртни случаи“, вели адвокат за осигурување од Хонгконг за агенцијата Ројтерс.
Засега никој не се осмелува да ги прогнозира трошоците.
Иако некои мултинационални компании купуваат осигурување кое покрива секојдневни болести, повеќето не ги вклучуваат и епидемиите, со цел да се намалат трошоците, велат експерти. Вообичаено осигурителните компании покриваат ризици како земјотреси или авионски несреќи, но се трудат да се ослободат од други ризици, со цел да избегнат големи загуби.
Претходните епидемии на вируси, како оние на САРС, Ебола и Зика, ги натераа осигурителните компании да бидат попретпазливи, па од стандардните полиси исклучуваат вируси.
Во 2003 година, епидемијата на САРС вирус предизвика економска штета од 4 милијарди долари во Хонгконг, меѓу 3 и 6 милијарди во Канада, и 5 милијарди во Сингапур, проценува осигурителниот брокер Марш.
Упатства: Како да се заштитите од коронавирус
Луѓето ширум светот ставаат заштитни маски за дишење за да спречат вирусна инфекција. Сепак, други мерки се поефикасни. Еве неколку совети засновани на упатствата на СЗО.
Фотографија: Getty Images/X. Chu
Подобро од ништо
Не е докажано дека маските за лице можат ефикасно да ве заштитат од вирусни инфекции. Овие маски веројатно се во можност да фатат некои микроби пред да стигнат до устата или носот. Но уште поважно е тоа дека тие ги спречуваат луѓето да ги допираат устата или носот (што повеќето луѓе го прават инстинктивно). Ако веќе сте болни, таквите маски може да спречат да не заразувате други.
Фотографија: Getty Images/Stringer
Дезинфицирајте ги рацете
Во својот список на препораки како да се заштитите од зарази, Светската здравствена организација не споменува маски за лице. На врвот е често миењето на рацете. СЗО препорачува дезинфекциско средство за рацете на база на алкохол, како на фотографијата, кои најчесто ги гледаме во болниците
Фотографија: picture-alliance/dpa/S. Pilick
И сапун и вода ќе завршат работа
Поедноставното секојдневно решение се водата и сапунот, ако ги имате при рака. Но, проверете дали темелно ги миете рацете...
Фотографија: picture alliance/dpa/C. Klose
Кашлање и кивање - но направете го тоа правилно!
Еве што препорачуваат лекарите: Кога кашлате и кивате, покријте ја устата и носот со вашиот подигнат лакот. Или користете книжни марамчиња - но потоа веднаш фрлете го марамчето и измијте ги рацете. А кошулата или џемперот? Не, нив не мора да ги фрлите. Но, перете ги често или однесете ги на хемиско чистење.
Фотографија: Fotolia/Brenda Carson
Стојте подалеку!
Друга препорака која можеби не функционира за сите: Избегнувајте близок контакт со секој кој има треска и кашлица! Ако треба да имате контакт со болни луѓе, погрижете се да преземете дополнителни заштитни мерки.
Фотографија: picture alliance/empics
Имате треска? Одете на лекар, а не на патување!
Ако имате треска, кашлица и отежнато дишење, побарајте лекарска помош навреме. Избегнувајте јавни места за да не ги инфицирате другите. И, исто така, објаснете му на вашиот лекар каде претходно сте патувале.
Фотографија: Reuters/P. Mikheyev
Избегнувајте контакт!
При посета на сточни и зелени пазари во области во кои во моментот има случаи на новиот коронавирус, избегнувајте директен незаштитен контакт со живи животни. Тоа исто така вклучува какви било површини кои се во контакт со животни.
Фотографија: DW
Добро термички обработено - не сурово!
Варете,печете и пржете го месото темелно. Потребно е да се избегне конзумирање на сурови, недоволно термички обработени производи од животинско потекло. Со суровото месо, млекото или животинските органи треба да се постапува внимателно за да се избегне инфицирање од термички необработена храна. Овие се добри практики за безбедност на храната и помагаат да се спречи ширењето на болести.
Фотографија: picture-alliance/Ch. Mohr
8 фотографии1 | 8
„Голем број авионски компании и хотели им нудат враќање на парите на своите клиенти. Без адекватно осигурување, тие ќе мора да ги преземат врз себе трошоците“, вели Ричард Којл, од осигурителната компанија Милер.
Некои компании купуваат полиси кои ги осигуруваат во случај на присилен прекин на работата, но тие не ги вклучуваат болестите. Некои компании, како Мјуних Ре, развија посебни осигурителни полиси за инфективни болести, но речиси никој не ги купува, велат познавачите.
Ударот врз туризмот и транспортот ќе се почуствува и врз снабдувањето. Локалната влада во Шангај веќе најави дека компаниите во градот нема да смеат да работат до 9 февруари, а тоа ќе се одрази и врз фирми како Фолксваген, Тесла и Џенерал Моторс.
Со проблемите можат да се соочат и индивидуалните осигуреници. Големите осигурителни компании во меѓувреме соопштија дека ќе покриваат трошоци само доколку осигурениците ги следат советите за патување на нивните влади, а некои куќи одбиваат осигурување за одредени дестинации.
